கீழடி அகழ்வு

-

2014இல் கண்டறியப்பட்டதிலிருந்து, தமிழகத்தின் கீழடி அகழ்வாராய்ச்சி இந்தியாவின் மிகவும் விவாதிக்கப்படுகிற அகழ்வாராய்ச்சிகளில் ஒன்றாக மாறியுள்ளது. கூர்மையான பார்வையுடனும் நகைச்சுவை உணர்வுடனும் அறிவியலையும் வரலாற்றையும் சுற்றியுள்ள அரசியல், இந்தியாவின் கடந்தகாலத்தைப் பற்றிய நமது புரிதலை எவ்வாறு மாற்றியமைக்கிறது என்பதை விளக்கமாக எழுதியிருக்கிறார் இதழியலாளர் சௌமியா அஷோக்.

பேரண்டத்தின் சுருக்கமான வரலாறு

-

காலம் எப்படித் தொடங்கியது? முதல் அணு எப்போது தோன்றியது? நாம் வாழும் இந்த பூமி எப்படி உருவானது? இதுபோன்ற கேள்விகளுக்கு மிக எளிய வடிவில் விடை தருகிறது இந்த நூல். பெருவெடிப்பில் தொடங்கி, விண்மீன் மண்டலங்களின் உருவாக்கம், பூமியின் தோற்றம், ஒரு செல் உயிரினத்திலிருந்து மனிதன் தோன்றியது வரையிலான நெடிய பிரபஞ்ச வரலாற்றை விறுவிறுப்பான கதையாகச் சொல்கிறது.

இஸ்ரேல் – பாலஸ்தீனத்தின் சுருக்கமான வரலாறு

-

ஐரோப்பிய யூதர்களின் இடம்பெயர்வில் தொடங்கி 2023 மோதல்கள் வரை இஸ்ரேல் - பாலஸ்தீனப் பிரச்சினையின் முழு வரலாற்றையும் சமநிலையான தரவுகளுடன் பேசும் நூல். வரலாற்றுச் சம்பவங்கள், தனிநபர் அனுபவங்கள் ஊடாக பாலஸ்தீனியர்களின் துயரத்தையும் இஸ்ரேலியர்களின் அச்சத்தையும் நேர்மையாகப் பதிவுசெய்கிறது.

ஜனநாயகத்தின் சுருக்கமான வரலாறு

-

மனிதகுலம் கண்டறிந்த அதிகாரப் பகிர்வு முறையின் 4000 ஆண்டுகால வரலாற்றை மிக எளிய, விறுவிறுப்பான நடையில் நமக்கு வழங்குகிறது இந்தப் புத்தகம். ஆரம்பகால  ‘பொதுச்சபை முறை’ தொடங்கி ஐரோப்பிய ‘தேர்தல் ஜனநாயகம்‘, டிஜிட்டல் யுகத்தின் ‘கண்காணிப்பு ஜனநாயகம்’ வரை அதன் பரிணாம வளர்ச்சியைப் படம்பிடித்துக் காட்டுகிறது.

சீனாவின் சுருக்கமான வரலாறு

-

பெரும்பான்மையான போர்களுக்குச் சர்வாதிகாரமே மூலவித்தாக அமைந்திருக்கிறது என்பதற்குச் சீனாவின் வரலாறே சிறந்த சான்று. பண்டைய அரச வம்சங்களின் ஆட்சி முதல் சமகாலக் கொரோனா பெருந்தொற்றுக் காலம் வரை அந்நாட்டின் வரலாற்றை முழுமையாக விரிக்கிறது இந்நூல்.

பிடிக்காத ஆசிரியர்

-பெரும்பாலான ஆசிரியர்களை மாணவர்களுக்குப் பிடிப்பதில்லை. அவர்களைப் பற்றித் தமக்குள் பேசிக் கொள்வது உண்டே தவிர பொதுவெளியில் பேசுவதும் இல்லை, எழுதுவதும் இல்லை. 'எழுத்தறிவித்தவன் இறைவன்' என்னும் பொதுமனக் கருத்தால் ஆசிரியரைப் புனிதப்படுத்தும் நம் மரபே இதற்குக் காரணம். பிடித்த ஆசிரியரைப் போற்றும் அதேசமயம் பிடிக்காத ஆசிரியரைப் பற்றியும் பொதுவெளியில் விவாதிக்க வேண்டியது அவசியம். மாணவர்களின் உளவியலைப் புரிந்துகொள்ளாமல் அதிகாரம், சாதி, பழிவாங்கும் உணர்வு, பணத்தாசை எனப் பல ஆசிரியர்கள் படுமோசமாக இருக்கின்றனர். இவற்றை அனுபவம் சார்ந்து வெளிப்படுத்தும் கட்டுரைத் தொகுப்பு இந்நூல் முப்பத்தாறு பேர் தம் மனக்குமுறல்களைக் கொட்டி எழுதியுள்ள இக்கட்டுரைகள் புழுங்கிக் கொண்டிருக்கும் பலரது உணர்வுகளைப் பிரதிநிதித்துவப்படுத்தும் வகைமாதிரிகள்.

மம்மர் அறுக்கும் மருந்து

-கல்விப் பிரச்சினைகள் பலவாக இருப்பினும் அவற்றைப் பற்றி பொதுவெளியில் பேசுவோர் குறைவு. ஒப்பீட்டளவில் பள்ளிக்கல்வியைப் பற்றிய எழுத்துக்களும் பேச்சுக்களும் கணிசமாக இருந்த போதிலும் உயர்கல்வி குறித்தவை அவ்வளவு இல்லை. அக்குறையைப் போக்கும் வகையில் தொடர்ந்து உயர்கல்விச் சிக்கல்களைப் பேசியும் எழுதியும் வருபவர் பெருமாள்முருகன். தமிழ் இலக்கிய மாணவராகப் பல நிறுவனங்களில் பயின்று அரசு கலைக்கல்லூரியில் தமிழ்ப் பேராசிரியராகவும் முதல்வராகவும் பணியாற்றி ஓய்வு பெற்ற அவர் தம் அனுபவத்தைக் கலந்து உயர்கல்வி குறித்து வெளிப்படப் பேசியுள்ள நீண்ட நேர்காணல் தொகுப்பு இந்நூல். ஜப்பான் தோக்கியோ அறிவியல் நிறுவனத்தில் வேதியியல் ஆராய்ச்சியாளராக இருக்கும் சா. விஜயகுமார் இதற்கான கேள்விகளை உருவாக்கி உள்ளார்.

தத்வமசி

-தத்வமசி

17ஆம் நூற்றாண்டின் சோழமண்டலக் கரையிலும் யாழ்ப்பாணக் குடாநாட்டிலும்

டச்சுக்காரர்களின் காலனிய நிழல் படர்கிறது. குருதியும் அடிமை வணிகமும் பேரழிவும்

மலிந்த பெருநிலத்தில், வாழ்வின் நிலையாமையை முகத்திலடித்தாற்போல் உணர்ந்து

மனை துறக்கிறான் ஒருவன். அகத்தின் வெளிச்சத்தைத் தேடி அலையும் அவனுக்குக்

காலம் சூட்டும் பெயர் ‘தத்வமசி’.

கிரிசாந்தின் பிரம்மாண்டமான புனைவெழுத்து, வரலாற்றின் அந்தகார உண்மைகளையும்

தத்துவத்தின் ஆழங்களையும் ஒன்றிணைக்கிறது. மானுட இருப்பைப் பற்றியும், அதன்

நித்தியமான ஆன்மீகத் தேடலைப் பற்றியும் துணிச்சலாகக் கேள்வி எழுப்பும் ஒரு

காலத்தின் பெருஞ்சித்திரம்.

அதிகாரத்தின் வாள்முனையில் அடியோடு வீழும் வாழ்விலிருந்து, ஆத்மா தன்

விமோசனத்தைக் கண்டடையும் தத்துவப் பயணம் இந்நாவல்.

ஈரம்

-ஈரம்

பயம், பக்தி, முட்டாள்தனம், ஏக்கம் முதலியன இக்கதைகளின் முக்கியமான

கருப்பொருட்கள். உளவியல் அதிர்வுகள் மனதிற்குத் தாக்கம் விளைவிக்கும்.

கூர்ப்பார்வையில் காட்சிகள் விரிகின்றன. நகைச்சுவையும் கசப்பும் கலந்த கதைகள்

வாசித்துச் சிலநாட்களுக்கு ஈரம் நீடிக்கும். மலேசியப் பண்பாட்டின் சிதறல்கள்

ஸ்ரீகாந்தனின் கதைகளுக்குள் ஒளிந்திருக்கின்றன.

- சரவணன் மாணிக்கவாசகம்

கதம்பம்

-கதம்பம்

இலக்கியம், வரலாறு, சிந்தனைத் துறைகளில் தமிழ் அறிவுலகம் எந்தப் பாதையில் பயணித்துக்கொண்டிருக்கிறது என்பதை எளிமையாகவும் தெளிவாகவும் அறிமுகப்படுத்துகிறது இந்நூல். தமிழ் மொழியில் ‘மெய்’ என்ற சொல் உடலையும் உண்மையையும் ஒரே நேரத்தில் குறிக்கும் தத்துவ அழகை விளக்குவது, பழைய புராணக் கதைகளை இன்றைய நவீன எழுத்தாளர்கள் எப்படிப் புதிய கோணங்களில் மறுவாசிப்பு செய்கிறார்கள் என்று ஆராய்வது, சிறுகதைகளில் வரலாற்றுத் தகவல்கள் எல்லை மீறும்போது கதைத்தன்மை எப்படிப் பாதிக்கப்படுகிறது என்பதைச் சுட்டிக்காட்டுவது எனப் பல சுவாரசியமான விவாதங்கள் அடங்கியுள்ளன. 

எளிய மக்களின் குரல்கள் சமூகத்தில் எப்படி ஒடுக்கப்படுகின்றன, சோழமண்டலக் கடற்கரையில் நெசவாளர்கள் எவ்வாறு பெரிய வணிகர்களாக வளர்ந்தார்கள், தமிழ்ச் சமூகத்தில் சாதி அமைப்புகளும் துறவற மரபுகளும் எவ்வாறு உருவெடுத்தன எனப் பல வரலாற்று உண்மைகளையும் இந்நூல் பேசுகிறது. இக்கட்டுரைகள், தமிழ்ப் பண்பாட்டையும் இலக்கியத்தையும் புதிய கண்ணோட்டத்தில் அணுகுவதற்குச் சிறந்த வழிகாட்டியாக அமையும்.

ராதாபாயின் சத்திரம்

-ராதாபாயின் சத்திரம்

தூயனின் கதைகள் மனித வாழ்வின் புதிரான கணங்களைப் பேசுகின்றன. அவை விலக முடியாத விதியின் நிழல்களைப் புனைவு மொழியில் சித்திரிக்கின்றன. இத்தொகுப்பில் உள்ள கதைகள் ஒவ்வொன்றும் தனித்துவமான நிலப்பரப்பை காண்பிக்கின்றன. 

அந்த நிலப்பரப்பைச் சேர்ந்த மனிதர்களின் தொன்மங்களும் நம்பிக்கைகளும் மனத்தின் விசித்திரங்களோடு உரையாடுகின்றன. விதியின் புதிர்ப்பாதைகளைக் காட்டுகின்றன. இக்கதைகள் யதார்த்தத்தின் அடித்தளத்திலிருந்து தொடங்கி, அங்கிருந்து மாயமும் படிமங்களும் அடர்ந்த புனைவுலகை நோக்கி நகர்கின்றன.

அட்சரேகை

-அட்சரேகை

கானலை நதி என்று நினைத்து நீந்தியவர்கள், அவர்களை ஆதரிசமெனக் கொண்டு நீந்த இறங்கியவர்களின் கதைகளும் கிளைக்கதைகளுமாக விரிகிறது கார்த்திக் பாலசுப்ரமணியனின் அட்சரேகை. இதில் இளமைக்கே உரிய வழக்கமான இலட்சியங்கள் பொருளிழக்கின்றன; அவற்றை நோக்கி நடையாய் நடந்த பாதை களிலும் ஒளி அவிந்துவிடுகிறது. பின் மிஞ்சுவது நினைவுகள் மட்டுமே. நினைவுகளில் செதுக்கிவைத்திருப்பவர்கள் புனைவின் கடைசிப் பக்கம் வரையிலும் உயிர்ப்புடன் வருகிறார்கள். ஏதேதோ திசைகளிலிருந்து, எதிர்பாராத திருப்பங்களிலிருந்து, சிலர் மறைந்த பின்னும், ஏன் செத்த பின்னும்தான்.

நினைவுகளோடு கலந்துவரும் பல்வேறு இடவெளிகளின் குவிமையமாகிறது ஒரு சிறிய அறை. அரசு வேலைகளுக்கான தேர்வுகளுக்குப் படிப்பவர்களுக்கு அவர்களது போராட்டங்களின், வீழ்ச்சிகளின், காயங்களின் சாட்சியாக இருக்கும் அறை. கதையை நகர்த்திச் செல்லும் சமூக, பொருளாதார வரலாறுகளை அந்த அறை பார்க்கிறது. அதன் கண்களோடு வாசகர் தன் கண்களைச் சேர்த்து இமைக்கக் கேட்கிறது.

கார்த்திக்குக்கு அநாயாசமாய் வசப்பட்டிருக்கும் யதார்த்த அழகியலோடு கூடவே சிதறுண்ட உணர்வுகளின் வண்ணங்களும் துல்லியமான விவரணைகளும் கதாபாத்திரங்கள் அடையும் பரிணாமங்களும் நாவலின் வலுப்புள்ளிகள். வாசகரை அவை பிரதிக்குள் இழுத்துப்போடுகின்றன.