வாழ்வை மீட்டிய கலை

-‘வாழ்வை மீட்டிய கலை’ என்ற தலைப்பில் அமைந்த இந்தத் தொகுப்பு, இலக்கியம் அல்லாது இசை, சினிமா, ஓவியம், நாட்டியம் உள்ளிட்ட பிற கலைகளின் மீதான சுகுமாரனது ஆர்வத்தையும் அக்கறையையும் ஈடுபாட்டையும் வெளிப்படுத்தும் கட்டுரைகளைக் கொண்டுள்ளது. கலைகளின் மீதான தீராத ஆர்வத்தைத் தக்கவைக்கும்படியாக அமைத்துக்கொண்ட அவரது தனிப்பட்ட வாழ்வுக்கும் அனுபவத்துக்கும் மிகப் பொருத்தமானதாகவே அவை அமைந்திருக்கின்றன.

எம். கோபாலகிருஷ்ணன்

பழைய சினிமா புதிய வரலாறு

-தமிழ் மக்கள் திரளைப் போல சினிமாவை வழிபடும் கூட்டம் வேறில்லை. அவர்களது அந்தரங்கத்திலும் பொதுப் புழக்கத்திலும் திரைப்படம் வலுவான தாக்கத்தை ஏற்படுத்தியிருக்கிறது; ஏற்படுத்திவருகிறது.

சி னிமாவைக் கலையாகவும் கலாச்சார நிகழ்வாகவும் ஆவணப்படுத்தி வைக்கும் அரிய செயலை இந்த நூல் மேற்கொண்டிருக்கிறது. திரைப்படத்தைப் பண்பாட்டு அடையாளம் என்ற வகையில் வரலாற்றுப் பார்வையுடனும் நம்பகமான தரவுகளின் துணையுடனும் ஆவணப்படுத்துகிறது. சினிமாவின் வரலாற்றை மட்டுமல்ல ஒரு காலகட்டத்தின் தமிழ்ச் சமூக வாழ்கையையும் பாதுகாத்து அளிக்கிறது இந்த நூல்.

பொம்பளைங்க பஞ்சாயத்து - பாலினச் சமத்துவத்திலிருந்து பாலின நீதியை நோக்கி

-கடைசியில் எல்லாம் பெண்களின் கேள்விகளில் வந்துநிற்கின்றன. ஏன், எதற்கு என்று அவர்கள் கேட்டுக் கொண்டே இருக்கிறார்கள்.

பல நூற்றாண்டுகளாக எழாத கேள்விகள் எழுகின்றன; ஒலிக்காத எதிர்ப்புக் குரல்கள் ஒலிக்கின்றன. சாதி, வர்க்கம், மதம், சமூக அந்தஸ்து ஆகிய எல்லை களைத் தாண்டி எல்லா மட்டங்களி லிருந்தும் பெண்களின் உரிமைக் குரல் ஒலிக்கிறது. இவற்றுக்குப் பதில் சொல்ல முடியாத ஆணாதிக்கச் சமூகம், “அட போம்மா. . . எப்போ பாத்தாலும் பஞ்சாயத்து பண்ணிக்கிட்டு” என்று சொல்லி அலட்சியப்படுத்தப் பார்க்கிறது.

ஆம், பெண்கள் பஞ்சாயத்துக் கூட்டுகிறார்கள். ஆணாதிக்கச் சமூகம் பாராமுகமாக இருந்தாலும் விடாமல் மல்லுக்கு நிற்கிறார்கள்.

இந்தப் ‘பஞ்சாயத்து’ காட்சிகளுக்கு மொழி வடிவம் தருகிறார் ஷாலின் மரிய லாரன்ஸ். பெண்களின் குரலை, நீதிக்கான வேட்கையை, வெறும் அறிவுத் தளத்தில் பிரதிபலிக்காமல் ஒடுக்கப்பட்ட விளிம்பு நிலைப் பெண்களின் நிலையிலிருந்து பிரதிபலிப்பது இவரது தனித்துவம். ‘சண்டைக்காரிகள்’ தொகுப்பில் வெளிப்பட்ட இந்தப் போர்க்குரல் இந்தத் தொகுப்பில் மேலும் விரிவான தளங்களிலிருந்து பெண்களின் அன்றாடப் பிரச்சினைகளை அலசித் தீர்வுகாண்பதற்கான சமரைத் தொடுக்கிறது.

குறுமக்கள் கொட்டாரம்

-குழந்தைகளுடன் பழகும்போது எத்தனையோ அதிசயங்கள் நிகழும். ஒரு எண்ணக்கீற்று தானாக மேலெழுந்து கவிதையாக, எழுத்தாக, இசைப் பாடலாக, நாடகமாக உருமாறும். குழந்தைகளுக்குக் கற்றுக் கொடுப்பதன் வழியாக நாமும் கற்றுக்கொள்ள முடியும். குழந்தைகளின் முன்னால் தன்னை ஒப்புக்கொடுத்து நிற்கும் கணங்களில் நிகழும் மாயம் இது. அந்த மாயக் கணங்களை இந்நூல் தரிசிக்க உதவும்.

அவிலா டீச்சர் என்னும் மழலையர் பள்ளி ஆசிரியையின் அனுபவங்களைப் பதிவுசெய்யும் இந்த எழுத்து, கற்றுக் கொடுத்தல் என்பது பாடம் எடுப்பது மட்டுமல்ல என்பதைச் சொல்கிறது. அவிலா டீச்சருக்கும் அவரிடம் பயிலும் குழந்தைகளுக்கும் இடையில் நிகழும் அதிசயக் கணங்களை, மழலைகளின் உரையாடலைக் கதைபோலச் சொல்லியிருக்கிறார் அவிலா டீச்சரின் கணவரும் மெல்லிசைக் கலைஞருமான எழுத்தாளர் ஜான் சுந்தர்.

மரபும் புதுமையும்

-சின்னச் சின்னத் தகவல்களை வைத்துப் பண்பாட்டு வேர்களின் அடி முடிவரை ஆழ்ந்த விசாரணையை நிகழ்த்துபவை தொ. பரமசிவனின் எழுத்துக்கள்.

 தமிழ்ப் புத்தாண்டுமுதல் பொதியமலையில் பிறந்த மொழி வரையில் அவர் நிகழ்த்திய அரிய ஆய்வின் விளைச்சல் இந்நூல்.

 'அன்னம் பஹு குர்வீத', 'தெய்வங்களின் உணவுரிமை' ஆகிய கட்டுரைகளின் வழியாக நெடிய தமிழ் மரபின் சாறுபிழிந்து வாசகர்களுக்குப் படைத்திருக்கிறார்.

 மரபின் வழியாகப் புதுமையைக் கண்டடையும் அற்புதம் தொ.ப.வின் ஆய்வு முறை.

பேசத் துணிந்த எழுத்துக்கள் (பெருமாள்முருகன் படைப்புலகம்)

-எழுத்தாளர் பெருமாள்முருகனின் படைப்புகள் குறித்த இருநாள் பன்னாட்டுக் கருத்தரங்கு திருச்சி, தந்தை பெரியார் கல்லூரித் தமிழாய்வுத் துறையில் 2025, ஜனவரி 7, 8 தேதிகளில் நடைபெற்றது. பெருமாள்முருகனின் புனைவுகள், அல்புனைவுகள், பிற மொழிகளுக்குச் சென்ற அவரது ஆக்கங்கள் ஆகியவை குறித்து இந்தக் கருத்தரங்கில் உரைகளும் உரையாடல்களும் நிகழ்ந்தன. எழுத்தாளர்கள், திறனாய்வாளர்கள், மொழிபெயர்ப்பாளரின்  உரைகள் கட்டுரை வடிவில் இந்நூலில்  தொகுக்கப்பட்டுள்ளன.

ஆய்வாளர்களில் பெரும்பாலோர் இளம் தலைமுறையினர். அவர்களின் வேறுபட்ட பார்வையை முன்வைக்கும் தீர்க்கமான கட்டுரைகள் இடம்பெறுவது  இந்நூலின்  தனித்துவம்.

பேராசிரியர்கள் க. காசிமாரியப்பனும் அ. செல்வராசுவும் தொகுத்துள்ள இந்த நூல் சமகாலப் படைப்பாளி ஒருவரின் பன்முகச் செயல்பாடுகளை ஒட்டுமொத்தமாக  அறியவும் மதிப்பிடவும் பெரிதும் துணைசெய்யும்.

புழுதிக்குள் சில சித்திரங்கள்

-சமகால வரலாறு என்பது மிகவும் சவாலான ஒரு அறிவுத் துறை. தரவுகளும் தகவல்களும் அதிகம் கிடைக்கும் என்றாலும் சமகாலத்தைப் பற்றி விருப்பு வெறுப்பின்றி எடை போடுவதற்கான கால இடைவெளி உருவாகியிருக்காது என்பது இதைச் சவால் மிகுந்ததாக ஆக்குகிறது.

இதழியல் சார்ந்த எழுத்தின் ஒரு பகுதியாக விளங்கக்கூடிய இவ்வகை எழுத்தில் எழுத்தாளர் தேவிபாரதி மிகுந்த ஈடுபாட்டுடன் செயல்பட்டிருக்கிறார். தான் நேரடியாகக் கண்ணுற்ற, அனுபவித்த இரண்டு அரசியல் நிகழ்வுகளைத் தன் வாழ்க்கை அனுபவங்களுடன் இணைத்துப் பார்க்கிறார். நெருக்கடி நிலைக் காலகட்டத்தையும் எம்ஜிஆர் உடல்நலம் குன்றியிருந்தபோது நடைபெற்ற தேர்தல் காலகட்டத்தையும் படைப்பாளியின் கண்ணோட்டத்துடன் விவரிக்கிறார். இயல்பாக இழையோடும் நகைச்சுவையும் நுட்பமான அவதானிப்புகளும் கொண்ட இந்தப் பதிவுகளைச் சமகால வரலாற்றின் படைப்பூக்கம் மிகுந்த எழுத்து என்று சொல்லலாம்.

இரவில் எல்லாருடைய இரத்தமும் கறுப்புத்தான் - கறுப்பு இலக்கியப் பதிவுகள் : கலை இலக்கியம்

-உலகின் பல்வேறு மொழிகளில் வெளியான கறுப்பிலக்கிய ஆக்கங்கள் 1980களுக்குப் பிறகு தமிழில் வரத் தொடங்கின. 1990களுக்குப் பிறகு அதன் பரப்பு விரிவடைந்ததோடு தமிழில் தலித்திய, பெண்ணிய எழுத்துகளின் மீதும் அது பெரும் தாக்கத்தை ஏற்படுத்தியது. காலச்சுவடு இதழில் வெளியான மொழியாக்கங்களுக்கு அந்தத் தாக்கத்தில் பெரும் பங்குண்டு.

1988 தொடங்கி 2025 வரையிலான காலச்சுவடு இதழ்களில்  வெளியான கறுப்பிலக்கியம், அவை தொடர்பான எழுத்துகள் முதன்முறையாக இந்நூலில் தொகுக்கப்பட்டுள்ளன. இந்தத் தொகுப்பில் கறுப்பிலக்கியத்தில் கலை- இலக்கியம் சார்ந்த புனைவுகளும் அ-புனைவுகளும் இடம்பெற்றுள்ளன. இப்பதிவுகளின் தேர்ந்தெடுக்கப்பட்ட ஆக்கங்களின் தொகுப்பு இந்த நூல்.

2025இல் காலச்சுவடு பதிப்பகம் தொடங்கி 30 ஆண்டுகள் நிறைவடைகின்றன. 2024 டிசம்பரில் காலச்சுவடு 300ஆவது இதழ் வெளியானது.  இந்தத் தருணங்களை முன்னிட்டுக் காலச்சுவடு இதழில் வெளியான முக்கியமான பதிவுகளை நூல்களாகத் தொகுக்கும் திட்டத்தின் தொடக்கமாக இந்தத் தொகுப்பு வெளியாகிறது.

அறம் பொருள் இன்பம் வீடு - மகிழ்ச்சியாக வாழ 40 வழிகள்

-அறம், பொருள், இன்பம், வீடுபேறு என்னும் சிந்தனை இந்து மதத்தின் மிகத் தொன்மையான கருத்தாக்கங்களில் ஒன்று. காலந்தோறும் இவற்றின் வெளிப்பாடு களும் விளக்கங்களும் மாறிவந்தாலும் ஆதாரமான பார்வைகள் மாற்றமின்றித் தொடர்கின்றன. வேதகாலம் முதல் இன்று வரை இந்த நான்கு அம்சங்கள் என்னவாக இருந்துவருகின்றன என்பதைக் கூறுகிறது இந்த நூல்.

அர்த்த சாஸ்திரம் வளங்களை உற்பத்தி செய்வதைப் பற்றியது. காம சாஸ்திரம் இன்ப நுகர்ச்சியைப் பற்றியது. தர்ம சாஸ்திரம் பிறருடைய பசியை நாம் கவனிக்க வேண்டும் என்கிறது. மோட்ச சாஸ்திரம் நமது பசியைத் துறந்து பற்றுக்களைக் களைவது பற்றிப் பேசுகிறது. இந்த நான்கும் இணைந்து மானுட வாழ்வுக்கான சட்டகத்தை உருவாக்கி அதற்கு நோக்கத்தையும் பொருளையும் வழங்குகின்றன.

இந்துப் புராணங்களையும் இந்திய மரபுகளையும் ஆழ்ந்து கற்றவரான தேவ்தத் பட்நாயக் இந்து சிந்தனை முறையைப் பற்றிய தெளிவான பார்வையை, நவீன அறிவின் வெளிச்சத்தில் கச்சிதமாகவும் சுவையாக வும் முன்வைக்கிறார்.

8 நிமிடங்கள் 46 விநாடிகள் 16 அலறல்கள் : கறுப்பு இலக்கியப் பதிவுகள் : அரசியல், சமூகம்

-1980களுக்குப் பிறகு கறுப்பிலக்கியப் பதிவுகள் தமிழில் பெருமளவில் வரத் தொடங்கின. தமிழில் தலித்திய, பெண்ணிய எழுத்துகளின் மீது இவை பெரும் தாக்கத்தை ஏற்படுத்தியிருக்கின்றன. ‘காலச்சுவடு’ இதழில் கறுப்பிலக்கியப் பதிவுகள் தொடர்ச்சியாக இடம்பெற்றுள்ளன. 1988-2025 ஆண்டுகளில் வெளியான இத்தகைய பதிவுகளின் தேர்ந்தெடுக்கப்பட்ட ஆக்கங்களின் தொகுப்பு இந்த நூல்.

இந்தத் தொகுப்பில் கறுப்பிலக்கியத்தின் அரசியல், சமூகம் சார்ந்த பதிவுகள் இடம்பெற்றுள்ளன.

காலச்சுவடு பதிப்பகம் தொடங்கி 30 ஆண்டுகள் நிறைவடைகின்றன. 2024 டிசம்பரில் காலச்சுவடு 300ஆவது இதழ் வெளியானது.  இந்தத் தருணங்களை முன்னிட்டுக் ‘காலச்சுவடு’ இதழில் வெளியான முக்கியமான பதிவுகளை நூல்களாகத் தொகுக்கும் திட்டத்தின் தொடக்கமாக இந்தத் தொகுப்பு வெளியாகிறது.

இங்கிவரை நாம் பெறவே - ஆளுமைகள் பற்றிய பார்வைகள்

-ஆளுமைகளின் வரலாறு என்பது சமூகத்தின் வரலாறாகவும் ஒரு காலகட்டத்தின் வரலாறாகவும் தொழிற்படுகிறது. “ஆளுமைகளினூடாகச் சமூக அசைவியக்கத்தை இனங்காண்பது சுவையான முறையியலாகும்” என்று வரலாற்றாய்வாளர் ஆ.இரா. வேங்கடா சலபதி குறிப்பிடுகிறார். இந்த நூலில் உள்ள கட்டுரைகள் அதைத்தான் செய்கின்றன.

சென்னைக் கிறித்தவக் கல்லூரியின் தமிழ்த் துறையில் உதவிப் பேராசிரியராகப் பணியாற்றிவரும் ஜெ. சுடர்விழி ஆளுமைகள், மரபிலக்கியம், நவீன இலக்கிய விமர்சனங்கள் சார்ந்து கட்டுரைகளை எழுதிவருகிறார். தமிழின் முக்கியமான ஆளுமைகள் சிலரைப் பற்றி அவர் எழுதிய தனித்துவமான கட்டுரைகள் அடங்கிய தொகுப்பு இது.

வி.மு. சுப்பிரமணியம், பரிதிமாற்கலைஞர், கு. அழகிரிசாமி, அம்பை, ஆ.இரா. வேங்கடாசலபதி, பாமா, இமையம் முதலான பல்வேறு ஆளுமைகளைப் பற்றிய விரிவான அலசல்கள் இதில் உள்ளன. ஆளுமைகளின் பின்புலம், வாழ்க்கை, செயல்பாடுகள் ஆகியவற்றைத் தொகுத்துத் தருவதோடு, அவர்களுடைய பங்களிப்புகள் குறித்த தனித்துவமான பார்வையும் இதில் வெளிப்படுவதைக் காணலாம்.

உ.வே. சாமிநாதையரை ஒதுக்கலாமா?

-உ.வே.சாமிநாதையரைப் பற்றித் தொடர்ந்து எழுதிவரும் பெருமாள் முருகன் அவரை

இருவிதங்களில் அணுகுகிறார். ஒன்று அவரது பதிப்பு நுட்பங்களையும் பதிப்பு வரலாற்றையும்

ஆய்வது. அவர் எழுதிய உரைநடை நூல்களிலிருந்து பெறுபவற்றைச் சமகாலம் சார்ந்து

விளக்குவது இரண்டாவது. இந்த இரண்டு அணுகுமுறை களிலும் எழுதிய கட்டுரைகளின்

தொகுப்பு இந்த நூல்.

முதல் அணுகுமுறையில் அமைந்த கட்டுரைகள் உ.வே.சா.வின் பதிப்புச் செயல்பாடுகள்பற்றி

ஆழமான பார்வைகளைக் கொண்டவை. மற்ற கட்டுரைகள் உ.வே.சா.வின் கருத்துக்கள்,

அணுகுமுறைகள், செயல்முறைகள் ஆகியவற்றின் வெளிச்சத்தில் சமகால அரசியலையும் சமூகப்

பிரச்சினைகளையும் அலசுகின்றன. வெளிவந்தபோது பலவித எதிர்வினைகளைப் பெற்ற

கட்டுரைகள் இவை.

உ.வே.சா.வை அவருடைய பணிகள் சார்ந்தும் அவருடைய வாழ்வையும் கருத்துக்களையும்

சமகாலப் பார்வை சார்ந்தும் நெருக்கமாக அணுகிப் பார்க்கும் இந்தக் கட்டுரைகள் உ.வே.சாவைப்

பற்றிய புரிதலை ஆழப்படுத்தக்கூடியவை.