ராமன் வனவாசம் போன வழி ஒரு தேடல்

-ராமன் வனவாசம் போகையில் எந்த வழியாகப் போயிருப்பான்? வால்மீகி ராமாயணம் நமக்கு ஓரளவு சரியான இட வர்ணனையைத் தருகிறது. ஆனால் இன்றைய வரலாற்றாசிரியர்கள், தொல்பொருள் ஆய்வாளர்களுக்கு ராமன் சென்ற பாதை எது என்பதில் உறுதியும் ஒருமித்த கருத்தும் இல்லை.

பழங்குறியீடுகள் கலைக்களஞ்சியம்

-பழங்குறியீடுகள் கலைக்களஞ்சியம் என்ற இந்த நூலில் கல்வெட்டுக்கள், ஓலைச்சுவடிகளிலிருந்து எடுக்கப்பட்ட 1127 குறியீடுகள் உள்ளன. ஒரு சொல்லுக்குப் பல்வேறு குறியீடுகள் இருப்பதையும் இந்த நூல் சுட்டுகிறது. ஒவ்வொரு குறியீட்டுக்கும் தமிழ், மலையாளம், ஆங்கிலம் ஆகிய மொழிகளில் விளக்கங்கள் கொடுக்கப்பட்டுள்ளன. ஆய்வுரையும் மூன்று மொழிகளில் தரப்பட்டுள்ளது. இந்நூலில் அளவைக் குறியிடுகள், அளவை அல்லாத குறியீடுகள், அளவை வாய்ப்பாடுகள், கூட்டெழுத்து வடிவங்கள், நிலஅளவை வாய்ப்பாட்டுக் குறியீடுகள் ஆகியன உள்ளன. தமிழ்மொழியில் குறியீடுகள் பற்றி தண்டபாணி சுவாமிகளின் அறுவகை இலக்கணத்தில் காண முடியும். வேறு சில நூல்களும் உள்ளன. சா. கணேசன் போன்ற சிலரின் கட்டுரைகளும் காணப்படுகின்றன. ஆனால், குறியீடுகளைப் பற்றிய விரிவான தொகுப்புக் களஞ்சியம் என்பது இந்த நூலின் சிறப்பு. நூலாசிரியரின் கடின உழைப்பு இந்த நூலுக்குப் பெருமை சேர்க்கிறது.

எடின்பரோவின் குறிப்புகள்

-இந்நூலில் உள்ள இரண்டு குறுநாவல்களும் வெவ்வேறு வகையானவை. துப்பறியும் கதையாக நகரும் ‘ரோஜா மலர்’ குறுநாவலில் வரும் ரோஜா மலர் அதனைமிகுபுனைவாகவும் மாற்றி விடுகிறது. ‘ எடின்பரோவின் குறிப்புகள்’ குறுநாவலில் தளையாக மாறும் குடும்ப உறவுகளிலிருந்து தொடர்ந்து விலகிச்செல்லும் அவனது சிக்கலான மனப்போக்கு விவரிக்கப்படுகிறது. இந்தக் குறுநாவல்களைப் புதுமையான வடிவமைப்புடன் நேர்த்தியாகப் படைத்திருக்கிறார் சுரேஷ்குமார இந்திரஜித்.

காரைக்கால் அம்மையார் தொன்மம் சமூக மானுடவியல் ஆய்வு

-இந்த நூல், காரைக்கால் அம்மையார் தொன்மத்தின் இரண்டு முதன்மையான கருத்துக்களைச் சமூக மானுடவியல் அணுகுமுறையில் ஆராய்ந்துள்ளது.

ஒன்று,

காரைக்கால் அம்மையார் கொண்ட பேய் உடம்பு என்பது இறப்பிற்குப் பிந்தைய ஆவிநிலையாகவும் அச்சம் தரத்தக்கதாகவும் அதீத ஆற்றலால் தீங்கு இழைப்பவர் என்பதாகவும் பிற்காலத்தவர் கொண்ட நம்பிக்கையை இந்நூல் மறுத்துள்ளது.

மாறாக, காரைக்கால் அம்மையார் கொண்ட பேய்மகள் வடிவமானது புராதனத் தாய்வழிச் சமூக அமைப்பில் புனித வடிவமாகப் போற்றப்பட்டுள்ளது. மானுட வாழ்க்கையின் மேம்பட்ட நிலை அது.

வழிபாட்டிற்குரிய பேய்மகளிர், பேரன்னை வழிப்பாட்டை நடத்தும் பூசாரிகள் ஆவார். இவர்கள் இறை ஆற்றலும் இயற்கையை ஏவல் கொள்ளும் ஆற்றலும் நிரம்பியவராகக் கருதப்பட்டனர். மிகப் பழைய உலக நாகரிக இனங்களில் இத்தகு பேய்மகளிரை அடையாளம் காணமுடியும். இதனை விளக்குகிறது இந்நூல்

இரண்டாவதாக,

தமிழரின் உணவுப் பண்பாட்டில் கணவன் இல்லாமல் மனைவி தனியே

விருந்தினரை வரவேற்று உணவு படைக்கும் நிலை இல்லை. ஆனால் இந்த வழக்கத்தைக் காரைக்கால் அம்மையார் புறந்தள்ளியுள்ளார். இதற்கான

காரணத்தையும் ஆராய்கிறது இந்நூல்.

ரோஸ் கலர் ஆணை

-சிவசங்கர் எஸ்.ஜே.வின் மூன்றாவது சிறுகதைத் தொகுதி இது. முந்தைய இரு தொகுதிகளிலுமிருந்த கோட்பாட்டு விசாரணைகள், வடிவப் பரிசோதனைகள், அடர்த்தியான சொற்சேர்க்கைகள், வாக்கிய அமைப்புகள் போன்றவற்றைக் கைவிட்டுக் குழந்தமைக்குத் திரும்பியிருக்கிற கதைகள் இவை. ஒரு வட்டாரத்தின் குளிர்மையையும் அந்த நிலத் தோற்றத்தின் ஒருபக்க யதார்த்தத்தையும் பரிவையும் பேச்சு வழக்கின் பின்னிருக்கும் இதத்தையும் இக்கதைகளில் தரிசிக்க முடியும். இத்தொகுதியிலுள்ள கதைகள் வட்டாரத்தின் சமூக யதார்த்தத்தில் பின்னிப் பிணைந்திருக்கும் பன்மைத்துவத்தையும், மதமென்றும் சாதிகளென்றும் பிரிந்து கிடக்கும் அதன் நுண்ணிய அளவிலான நில வேறுபாடுகளையும் கொண்ட அசலான படைப்பாக உருப்பெற்றிருக்கின்றன.

      இவை சிவசங்கர் என்கிற எழுத்தாளரின் துளிர்     காலத்தைச் சொல்கிற கதைகள்

பாபாசாகேப்பின் பதிப்புலகம்; அறிவு மரபும் அதிகாரப்படுத்தலும்

-பாபாசாகிப் அம்பேத்கரின் அறியப்பட்ட அடையாளங்களைத் தாண்டி "இதழாளர் அம்பேத்கர்" என்னும் பக்கத்தைத் திறந்து காட்டுகிறது இந்நூல். வாழ்ந்தபோதும் பின்னரும் ஊடகங்களால் பெருமளவு புறக்கணிக்கப்பட்ட அம்பேத்கரே ஊடகராகச் செயல்பட்டது வரலாறு. அம்பேத்கரின் சிந்தனை வெளிப்பாட்டிற்கும் செயல்பாடுகளுக்கும் ஊன்றுகோலாக இருந்த இதழியல் பணிகள் பற்றித் தமிழில் இதுவரை வெளிவராத தகவல்களைக் கொண்டு அறிமுகம் செய்திருக்கிறார் பா. பிரபாகரன்.

மனிதனா,இயந்திரமா: வெல்லப்போவது யார் ? செயற்கை நுண்ணறிவு :ஓர் அறிமுகம்

-செயற்கை நுண்ணறிவு இன்றைய சூழலில் ஆர்வத்தையும் அச்சத்தையும் ஏற்படுத்திவருகிறது. அது நன்மையா தீமையா என இன்று விவாதம் நடந்துகொண்டிருக்கிறது.

செயற்கை நுண்ணறிவு சார்ந்து உருவாகிவரும் தொழில்நுட்பம் நான்காவது தொழில்நுட்பப் புரட்சி எனக் கூறப்படுகிறது. இந்தத் தொழில்நுட்பப் புரட்சியில் எந்தெந்த வேலைகள் நிலைக்கும், எவை மங்கி மறைந்துபோகும் என்பது பெரிய கேள்வியாக எழுந்து நிற்கிறது.
செயற்கை நுண்ணறிவு என்றால் என்ன, இந்தத் துறையில் இன்று மேலோங்கியுள்ள நுட்பங்கள் என்னென்ன, இதன் சாதக பாதகங்கள் என்ன, இந்தத் துறையில் மேல் படிப்பு படிக்க என்ன செய்ய வேண்டும் எனப் பல அம்சங்களையும் குறித்த விரிவான அறிமுகம்தான் இந்நூல்.
அறிவியல் தொடர்பான நூல்களை படைத்துவரும் முனைவர் சசிக்குமார் எழுதியிருக்கும் இந்த அறிமுக நூல் செயற்கை நுண்ணறிவு குறித்த பல்வேறு கேள்விகளுக்கு விடையளிக்கிறது. இவர் இஸ்ரோவில் பணிபுரிகிறார்

ஒரு புளியமரத்தின் கதை பொன்விழா பதிப்பு

-சுந்தர ராமசாமி, தமக்கு இடங்கள், காலங்கள், மனிதர்கள், மனித உறவுகள் மீது

அக்கறை உண்டு என்றும் அதன் விளைவே தமது நாவல்கள் என்றும்

குறிப்பிடுகிறார். 'ஒரு புளியமரத்தின் கதை' இடமும் காலமும் சார்ந்த படைப்பு,

'ஜே.ஜே.ஃ சில குறிப்புகள்' காலமும் கருத்தும் சார்ந்த படைப்பு, 'குழந்தைகள்

பெண்கள் ஆண்கள்' மனித உறவுகளைச் சார்ந்த படைப்பு என்று

சுட்டிக்காட்டியுமிருக்கிறார்.

இடத்தையும் காலத்தையும் சார்ந்த படைப்பாக சுந்தர ராமசாமியால்

சொல்லப்படும் 'ஒரு புளியமரத்தின் கதை' உண்மையில் அவரது பிற்கால

நாவல்களுக்கு முன்னோடியானது.

இடமும் காலமும் மட்டுமல்ல மனிதர்களும் உறவுகளும் கருத்துக்களும் இந்த

முதல் நாவலிலேயே விரிவாகப் பேசப்படுகிறது என்பதை இன்றைய

மறுவாசிப்பில் திட்பமாக உணர முடிகிறது. புளியமரத்தின் நிழலில் துளிர்விட்ட

முளைகள்தான் பிந்திய நாவல்களாக வேரூன்றியிருக்கின்றன. அந்தவகையில்

'ஒரு புளியமரத்தின் கதை' சுந்தர ராமசாமியின் நாவல் கலைக்கு முன்னோடி.

அதே சமயம் இன்றைய நாவல்களுக்கு நிகரற்ற சவால். எழுதப்பட்டு அரை

நூற்றாண்டுக் காலத்துக்குப் பின்பும் புதிய போக்குகள் கடந்து சென்ற பின்பும்,

வடிவிலும் மொழியிலும் பொருளிலும் புதுமை குன்றாமல் வாசிப்பின்பம்

குலையாமல் நிலைபெற்று நிற்கிறது.

எனது பர்மா குறிப்புகள்

-செ. முஹம்மது யூனூஸ் 43 ஆண்டுகளுக்கு முன்னால் பர்மாவிலிருந்து ஹாங்காங்கிற்குப் புலம் பெயர்ந்தவர். அதற்கு முன்னர், அவர் பிறந்து, வளர்ந்து 42 ஆண்டுகள் வாழ்ந்த, ‘பர்மியத் திருநாட்'டைப் பற்றி இந்த நூலில் சொல்கிறார். தமிழர்கள் பர்மாவில் செல்வாக்கோடு வாழ்ந்த காலத்தில் தொடங்குகின்றன இப்பதிவுகள். இரண்டாம் உலகப்போர், ஜப்பானிய ஆக்கிரமிப்பு, நேத்தாஜியின் இந்திய சுதந்திர லீக், பர்மீயர்களின் விடுதலை, ராணுவ ஆட்சி, இந்தியர்கள் நேரிட்ட வாழ்வுரிமைச் சிக்கல்கள் என்று தொடரும் பதிவுகள், கணிசமான இந்தியர்கள் பர்மாவிலிருந்து வெளியேற நேர்ந்ததுவரை நீள்கிறது. யூனூஸின் குறிப்புகள் பர்மீயத் தமிழர்களின் வாழ்வு, கலாச்சாரம், கலை, இலக்கியம் அனைத்தையும் தொட்டுச் செல்கிறது. தான் வாழ்கிற சமூகத்தைக் குறித்த அக்கறையும், சக மனிதர்கள்மீது எல்லையற்ற நேசமும்கொண்ட யூனூஸின் பதிவுகள், ஒரு காலகட்டத்தின் சமூக வாழ்வையும் வரலாற்றையும் ஒரு சேரச் சொல்லிச் செல்கிறது.

Turn on screen reader support

தி. ஜானகிராமன் நினைவோடை

-தமிழின் முக்கியமான ஆளுமைகள் குறித்த சுந்தர ராமசாமியின்

‘நினைவோடை வரிசையில் ஏழாவது நூல் இது. இலக்கிய

வாசகர்களை மட்டுமல்லாமல் வெகுஜன வாசகர்களையும் தன்

சிறுகதைகளாலும் நாவல்களாலும் கவர்ந்தவர் தி. ஜானகிராமன்.

படைப்புகள் மூலமாக அவரது இலக்கிய முகத்தை மட்டுமே

அறிந்த வாசகர்களுக்கு தி. ஜா. வின் இன்னொரு முகத்தை

அறிமுகம் செய்கிறது இந்நூல்.

ஜானகிராமனுடன் நேரில் பழகியவர்கள், ‘அவருக்கு

இணையான ஒரு ஸ்னேகிதனை’ப் பார்த்ததே கிடையாது என்று

சொல்லும் வகையில், எந்தவிதமான எதிர்பார்ப்போ

ஆக்கிரமிப்போ இல்லாமல் சகஜமாக நட்புறவு கொள்ளும்

சுபாவத்தையும் சக எழுத்தாளரின் படைப்பாற்றலை

வெளிப்படையாகவே பாராட்டும் உயர் குணத்தையும் இயல்பான

அவரது தன்னடக்கத்தையும் தனக்கேயுரிய பாணியில்

மிகையேதுமின்றிப் பதிவு செய்திருக்கிறார் சுந்தர ராமசாமி.

விழுப்புரம் படுகொலை 1798

-1978 ஜூலை 25, 26 தேதிகளில் விழுப்புரத்தில் தலித் அல்லாதோருக்கும் தலித்துகளுக்கும் இடையே பெரிய கலவரம் ஏற்பட்டது. கலவரத்தில் 12 தலித்துகள் படுகொலை செய்யப்பட்டனர். கலவரத்தை விசாரிக்க அரசாங்கம் நியமித்த விசாரணைக் கமிஷனிடம் தலித் மக்கள் சார்பாக சமர்ப்பிக்கப்பட்ட மாற்று விசாரணை அறிக்கையை சிறுநூலாக D. டேவிட் வெளியிட்டார் (1979). அந்நூலைப் புதிய பின்னிணைப்புகளோடு ஸ்டாலின் ராஜாங்கம் பதிப்பித்துள்ளார். விழுப்புரம் படுகொலையைப் பற்றி விரிவான முறையில் வெளியாகும் முதல் நூல் இதுவே.

இதம் தந்த வரிகள்

-

ஒருத்தி

-அம்ஷன் குமார் நம்முடைய சூழலின் பிரத்யேக வாழ்க்கை நிலை மற்றும்

நிலவெளி குறித்த உணர்வுடன் உருவாக்கியுள்ள ஒருத்தி திரைப்படம்

ஜெயகாந்தனின் உன்னைப் போல் ஒருவன், நிமாய்கோஷின் பாதை தெரியுது

பார் . . . ஆகிய படங்களின் வரிசையில் வைத்துச் சொல்லப்பட வேண்டிய ஒரு

முக்கியமான முயற்சி.

நல்ல இலக்கியப் படைப்பை படமாக்கினால் நல்ல சினிமாவாகவும் இருக்கும்

என்பதற்கு உத்தரவாதம் கிடையாது. அம்ஷன் குமார் அதை சாதித்திருக்கிறார்.

ஜாதிப் பிரச்சினையைப் பேசும்

படங்களில், கதை மேல் ஜாதிக்காரரின் பார்வையிலேயே நகரும். இந்தப்

படத்தின் கதை தலித் பெண்ணின் பார்வையில் நகர்கிறது.

வாழ்க சந்தேகங்கள்

-கேள்வி-பதில். எந்தக் காலத்திலும் மனித மனங்களை வசீகரித்து வந்திருக்கும்

ஒரு படைப்பு வடிவம். குமுதம் தீராநதி இதழுக்கு வாசகர்கள் கேட்ட

கேள்விகளும் அவற்றிற்கு சுந்தர ராமசாமி அளித்த பதில்களும் இங்கு

தொகுக்கப்பட்டுள்ளன. சிறுபத்திரிகை எழுத்தாளர்கள்மீதான கவனம்

அதிகரித்திருப்பது, இயக்கங்களின் இன்றைய நிலை, ஹாலிவுட் நடிகர்

டென்சில் வாஷிங்டனின் படம், மதமாற்றத் தடைச் சட்டம், தலித் இலக்கியம்

எனப் பல விஷயங்கள் குறித்து வாசகர்களுடன் தீவிரமாக உரையாடல்

நிகழ்த்துகிறார் சு.ரா. வெளியான சமயத்தில் பெரும் வரவேற்பைப் பெற்று,

காசாரமான விவாதங்களை எழுப்பிய இந்தத் தொடர் இப்போது நூல் வடிவம்

பெறுகிறது.

ஜி. நாகராஜன் நினைவோடை

-ஜி. நாகராஜனைச் சந்தித்துப் பழகத் தொடங்கிய ஆரம்ப நாட்களில் தன்னைப்

பிரமிக்கவைத்த அவரது ஆளுமை பற்றிய, அவரது விசித்திரமான போக்குகள்

பற்றிய, அவரிடமிருந்த ‘அற்புதமானதும் அதிசயமானதுமான' ரகசிய உலகம்

பற்றிய சுவாரஸ்யமான நினைவுகளைப் பதிவுசெய்துள்ளார் சுந்தர ராமசாமி.

காலங்கள் செல்லச் செல்ல நாகராஜனின் கோலங்கள் நசியத் தொடங்கியதை -

ஹோட்டல் சர்வர்களே ஆச்சரியப்படும் விதத்தில் ‘எக்கச்சக்கமாக'ச்

சாப்பிட்டவர், பின்னாளில் ஒரு சின்ன லட்டு சாப்பிடவே சிரமப்படும் நிலைக்குத்

தன்னை ஆளாக்கிக்கொண்டதை – துக்கம் கசியும் மனத்துடன் இந்நூலில் சுந்தர

ராமசாமி நினைவுகூர்ந்துள்ளார்.

எம்.டி. ராமநாதன்

-கர்நாடக இசையுலகில் எம்.டி. ராமநாதன் ஒரு துருவ நட்சத்திரம். சங்கீத்ததால் அல்ல, சங்கீதத்துக்காக வாழ்ந்த நாதயோகி அவர். அவரது வாழ்வில் முக்கிய நிகழ்ச்சிகளைக் கவிதை வடிவில் முன்வைக்கும் இலக்கிய முயற்சி இந்த நீள் கவிதை. ஓர் இசைக் கலைஞரின் வாழ்வைப் பேசுபொருளாகக் கொண்ட ஆக்கம் ஒருவகையில் முன்னுதாரணமற்றது. பி. ரவிகுமார் மலையாளத்தில் எழுதிய கவிதையை அதன் உயிர்ப்பும் உணர்வு குன்றாமல் ‘எழுத்து’ காலக் கவிஞர் மா. தக்ஷிணாமூர்த்தி தமிழாக்கியுள்ளார். இலக்கிய வாசகருக்கு இது இனிய சங்கீதம். இசை ரசிகருக்கு நூதன வாசிப்பு அனுபவம்.

பாரதியின் கடிதங்கள்

-கல்வி கற்பதற்கு எட்டயபுரம் அரண்மனையின் பொருளுதவி வேண்டி, பதினைந்து வயதுச் சிறுவனாக எழுதிய கவிதைக் கடிதம் முதல், இறப்பதற்குக் கொஞ்ச காலத்திற்கு முன்பு குத்தி கேசவப்பிள்ளைக்கு எழுதிய கடிதம் வரை, பாரதி எழுதிய இருபத்துமூன்று கடிதங்களின் அரிய தொகுப்பு இது. திலகர், மு. இராகவையங்கார், பிரிட்டிஷ் பிரதமர் ராம்சே மக்டோனால்டு, பரலி சு. நெல்லையப்பர் முதலானவர்களுக்கு எழுதிய இக்கடிதங்கள் நுட்பமான வாசிப்புக்கு உரியவை. பாரதி புதையல் திரட்டுகள், சித்திரபாரதி ஆகிய அருங்கொடைகளை வழங்கிய பாரதி அறிஞர் ரா.அ. பத்மநாபன் (1917) அவர்களின் பெருமுயற்சியில் உருவான நூலின் செப்பமான இரண்டாம் பதிப்பு இது.

கு.அழகிரிசாமி சிறுகதைகள்(1942-1969)

-சில சமயம் நான் கண்ட உண்மையைக் கூறுவேன். நான் பெற்ற இன்பத்தை

உணர்த்துவேன். நான் விரும்பும் சீர்திருத்தத்தை வற்புறுத்துவேன். நான் அழிக்க

விரும்பும் தீமைகளைச் சாடுவேன். இத்தனையும் செய்யாவிட்டால் மன

உலகில் கூடச் சுதந்திர புருஷனாக இருக்க முடியாது. ஆகவே எழுதாமல்

இருக்க முடியாது என்ற காரணங்களை முன்னிட்டே நான் எழுதிவருகிறேன்.

சுந்தர ராமசாமியின் கவிதைக் கலை

-தமிழில் கவிஞர்களும் கவிதைகளும் அதிகம். இந்தப் பெருக்கத்துடன்

ஒப்பிட்டால் கவிதையியல் பற்றிய விமர்சனங்கள் குறைவு. குறிப்பாக ஒரு

மூத்த கவிஞரின் கவிதை பற்றிய தனிப்பட்ட ஆய்வு என்ற வகையில்

அமைந்தவை அதிலும் குறைவு

இந்த நூல் சுந்தர ராமசாமியின் அநேகமாக எல்லாக் கவிதைகளையும் குறித்துக்

கவனம் கொள்கிறது. அந்த வகையில் தமிழில் இது ஒரு முன் முயற்சி. சுந்தர

ராமசாமியின் ஒவ்வொரு கவிதை பற்றியும் தனது வாசிப்பனுவத்தை

ஆதாரமாகக்கொண்டு ராஜமார்த்தாண்டனால் பேச முடிகிறது என்பது கவிதை

அனுமதிக்கும் பெரும் வாய்ப்பு. வியப்பளிக்கிறது இந்த வாய்ப்பு.

பருவநிலை மாற்றம்

-சூழலியல், பருவநிலை மாற்றம் குறித்த விழிப்புணர்வின் அவசியத்தைப் பள்ளி,

கல்லூரி மாணவர்களும் பொதுமக்களும் புரிந்துகொள்ளும் வகையில் இந்நூல்

அமைந்துள்ளது. சூழலியல், பருவநிலை குறித்த உண்மைகள் மாணவர்களின்

தேர்வுக்கான வினாவிடையாக மட்டும் நின்றுவிடக்கூடியவையல்ல

என்பதையும் அழுத்தமாகச் சுட்டுகிறது.

கொரோனா பெருந்தொற்றுக்குப் பிந்தைய பருவநிலை மாற்றம் குறித்த

பன்னாட்டு அறிக்கைகள், ஆய்வுக் கட்டுரைகளின் அடிப்படையில் பருவநிலை

மாற்றத்திற்கான காரணிகளைத் தொகுத்துத் தருகிறது.

பொதுமக்களின் வாழ்க்கைக்கும் பருவநிலை மாற்றத்திற்கும் உண்டான

தொடர்பை வலுவான முறையிலும் எளிய நடையிலும் விளக்குகிறது.

பருவநிலை மாற்றம் குறித்த விழிப்புணர்வு அன்றாட வாழ்க்கையில்

தவிர்க்கவியலாதது என்று இந்த நூல் உணரவைக்கிறது.