சிப்கோ இயக்கம்: ஒரு மக்கள் வரலாறு (இ-புத்தகம்)

1973ஆம் ஆண்டில் நிறுவப்பட்ட சிப்கோ இயக்கத்தின் வழியாகவே இந்தியாவில் நவீனச் சூழலியல் இயக்கம் தொடங்கியது. சிப்கோ இயக்கச் செயல்பாடுகளால் மரங்களை வெட்டுவது தடுக்கப்பட்டதோடு, நீடித்த பயனுள்ள காடுகளுக்கும் அதைச் சார்ந்திருக்கும் மக்களுக்கும் இடையேயான சூழல் சமநிலையைப் பேணுவதில் இந்தியா கவனம் செலுத்தியது. கல்வியியல், கொள்கை வகுப்பாளர்கள் மத்தியில் வளங்குன்றா வளர்ச்சி குறித்த விரிவான விவாதங்களைக் கிளறிவிட்டது. 

சிப்கோவின் வரலாற்று அறிஞர்கள் இதுவரை சண்டி பிரசாத் பட், சுந்தர்லால் பகுகுணா ஆகிய இரண்டு முக்கியத் தலைவர்களைப் பற்றிக் கவனம் செலுத்தினார்கள். ஆனால் எளியோர்கள், இன்று சிப்கோ இருக்கக் காரணமான கௌரா தேவி போன்ற பெண்கள் உள்ளிட்ட அடிமட்டத்தைச் சேர்ந்தவர்களின் குரல்கள் பதிவு செய்யப்படவில்லை. சேகர் பாதக் இந்த மக்கள் வாழும் பகுதிகளில் வசித்தவர். நிலங்களை நுட்பமாக ஆராய்ந்தவர், போராட்டக்காரர்களையும் இயக்கக்காரர்களையும் சந்தித்து உரையாடியவர், அந்தக் காலகட்டத்தின் உள்ளூர் செய்தித் தாள்களைத் தேடிக் கண்டுபிடித்தவர். சிப்கோ இயக்கம் தலைமையிலும் கொள்கையிலும் பன்மைத்துவம் கொண்டிருந்தது என்பதையும் அது ஒருபோதும் காந்திய இயக்கமாக மட்டும் இருக்கவில்லை என்பதையும் காட்டுகிறார்.  

இந்த நூல் சிப்கோ இயக்க வரலாற்றின் அனைத்துப் பரிமாணங்களையும் ஆதாரபூர்வமாகப் பதிவுசெய்கிறது.

துடிமேளக்காரன் (இ-புத்தகம்)

சற்று முந்தியோ பிந்தியோ வந்தால் நாம் தவறவிட்டுவிடக்கூடிய குறுகிய தருணங்கள், உற்றுப் பார்த்தாலன்றி நமது ஊனக் கண்களுக்கு அவ்வளவாகப் புலப்படாத சிறிய மகத்துவங்கள், நெருங்கிப்போய் நின்றால் அல்லாமல் நெட்டுயிர்த்து நம்மால் சுவாசிக்கமுடியாத மிருதுவான நறுமணங்கள், குழந்தையின் மனம் கொண்டு திரிந்தால் மாத்திரமே தென்படும் திகைப்புகள் என நாம் எதிர்கொண்டு அவசரமாகக் கடந்திடும் அன்றாடத்தின் எளிய அனுபவங்களில் உள்ளுறைந்திருக்கும் அழகுகளையும் ஆழத்தையையும் அறுதியிட்டு, ‘இதோ இவ்வளவு பெறுமதிகளும் உங்களுக்கு உரிமையானவைதாம்!’ என நம்மிடம் உவக்கச் சொல்கின்றன இக் கவிதைகள். ஜானின் சுந்தரமான சொற்களில் இழைந்திருப்பது திகட்டச் செய்யும் இனிமை மட்டுமல்ல, இதழ்க்கடையில் இயல்பாக பூக்கும் நகையின் முடிவில் நம்மையறியாமல் விழிநுனியில் துளி நீர் கோர்த்து நிற்கும் அநாதரவான கணங்களும் அடங்கும். அந்தக் கரிப்புதான் இந்த கவிதைகளில் வெளிப்படும் வெகுளியான சிரிப்பை அழியாத ஒன்றாகவும் ஆக்குகிறது.

க. மோகனரங்கன்

எஸ்தர் (இ-புத்தகம்)

சென்ற நூற்றாண்டின் 76களில் வெளியான 'எஸ்தர்' சிறுகதைத் தொகுதி, தமிழ்ப் புனைகதை வெளியில் அரை நூற்றாண்டைக் கடந்து இன்றும் தன் அடர்த்தி குறையாமல் நிலைத்திருக்கிறது. எழுபதுகளின் தமிழ்ச் சிறுகதை மரபில் எந்தவிதப் பாசாங்குமற்று, வாழ்வை அதன் அசல் தன்மையோடு எதிர்கொண்டவர் வண்ணநிலவன். அவரது புனைகதை உலகிற்குள் நுழைவதற்கான வாசல் இந்நூல். உதாசீனங்களின் நடுவிலும் ஈரம் காயாத மனங்கள், வறுமையின் விளிம்பிலும் அறம் நழுவாத எளிய மனிதர்கள், அகம் உருகும் தருணங்களின் மௌனம் என இத்தொகுப்பில் உள்ள 17 கதைகளும் வாசகரது மனதை அலைக்கழிக்கின்றன. வார்த்தைகளின் ஆடம்பரமில்லாத நேரடிப் பகிர்வும், நுட்பமான பாத்திர வார்ப்பும் கொண்ட இக்கதைகள் தமிழ் யதார்த்தச் சிறுகதைப் போக்கிற்குத் தனித்துவமான அழகியலைக் கூட்டியவை. வாழ்வின் துயரங்களுக்கு இடையிலும் மானுடப் பற்றின் சுனைகளைக் கண்டடையும் இப்படைப்புகள், வாசித்து முடித்த பிறகும் நம் மன அடுக்குக்குள் தீராத நடுக்கத்தையும் பிரியத்தையும் எஞ்சியிருக்கச் செய்கின்றன.

கனவுகளின் வரைபடம் (இ-புத்தகம்)

இளம்பருதியின் வாழ்க்கை ஈழத்தின் யோகபுரத்தில் தொடங்குகிறது. அது கனடாவின் பனி படர்ந்த வீதிகள் வரை நீள்கிறது. அவனது இளமைக்காலம் இடதுசாரிச் சிந்தனைகளும் லட்சியங் களும் நிறைந்தது. ஆனால், போர் அந்த வாழ்வைச் சிதைக்கிறது. அவன் புகலிடம் தேடிப் புலம்பெயர்கிறான். புதிய தேசத்தில் தனது அடையாளத்தைத் தேட முயற்சிக்கிறான். இன்னொரு பக்கம், அன்றாட உழைப்பிலேயே வாழ்க்கை கரைந்துபோகிறது. புலம்பெயர்ந்த தமிழர்களின் வாழ்வில் உள்ள இத்தகைய முரண்பாடுகளை நாவல் பேசுகிறது. புகலிட வாழ்வின் பொருளாதாரத் தேவைகள் மனித உறவுகளில் விரிசலை உண்டாக்குகின்றன. திருமண உறவுகள்கூட வணிகமாக மாறிப்போகின்றன. இவற்றை பொ. கருணாகரமூர்த்தி நாவலில் அழுத்தமாகப் பதிவு செய்கிறார். ஈழம், கனடா என இரு வேறு நிலப்பரப்புகளுக்கு இடையே இந்தப் பயணம் அமைகிறது. இந்த வரைபடம் சிதைந்த மனங்களின் சாட்சியமாக நிற்கிறது. வாழ்வின் கசப்பையும் இனிப்பையும் ஒருசேரப் பகிர்ந்துகொள்கிறது.

சக்தி வைத்தியம் (இ-புத்தகம்)

‘மானுடச் சேட்டை’களை அவதானிப்பதே  பொதுவாகத் தி. ஜானகிராமனின் இலக்கிய நோக்கம். அறிந்தும் அறியாமலும் மனிதர்கள் நடந்துகொள்ளும் முறையை எடுத்துரைப்பதே அவரது எழுத்தின் இயல்பு. பதினொரு சிறுகதைகளையும் ஒரு குறு நாவலையும் உள்ளடக்கிய இந்தத் தொகுப்பும் தி.ஜா.வின் எழுத்திலக்கணத்தின் சான்று. 

சாகித்திய அகாதெமி விருதை 1979இல் தி. ஜானகிராமனுக்குப் பெற்றுத் தந்த தொகுப்பு ‘சக்தி வைத்தியம்.’

இயற்கையோடு பேசியவர்கள் (இ-புத்தகம்)

இந்தியா போன்ற வளர்ந்துவரும் நாடுகளில், சூழலியல் விழிப்புணர்வு தோன்ற முடியாது என்பதே அயல்நாட்டுச் சமூகவியலாளர்களின் கருத்து. அக்கருத்து தவறு என்பதை வரலாற்றாசிரியர் ராமச்சந்திர குஹாவின் இந்நூல் நிரூபிக்கிறது.

மேற்கில் சுற்று சூழல் விழிப்புணர்வின் முதல் அசைவாகக் கருதப்படும் ரேச்சல் கார்சனின் ‘சைலன்ட் ஸ்பிரிங் (1962)’ நூல் வெளியாவதற்குப் பல ஆண்டுகளுக்கு முன்பே இந்தியாவில் காந்தி, தாகூர், ராதாகமல் முகர்ஜி, ஜே.சி. குமரப்பா, பேட்ரிக் கெடஸ், ஆல்பெர்ட்-கேபிரியல்லா ஹோவர்ட், மீரா, வெரியர் எல்வின், கே.எம். முன்ஷி, மா. கிருஷ்ணன் ஆகிய பத்து அறிஞர்கள் சுற்றுச்சூழலைப் பற்றிய அக்கறையைத் தங்கள் பணியிலும் எழுத்திலும் வெளிப்படுத்தினார்கள். 

நூறாண்டு காலத்தில் வெளிப்படுத்தப்பட்ட அவர்களது சிந்தனைகளை, அரசியல் -சமூகப் பின்புலத்தில் வழங்கும் இந்நூல் குஹாவின் ஆய்வுப் புலமைக்கு இன்னொரு சான்று. 

தமிழில் சுற்றுச்சூழலியல் எழுத்தின் முன்னோடியான தியடோர் பாஸ்கரனின் இந்த எளிமையான மொழிபெயர்ப்பு சுற்றுச்சூழல்  சிந்தனைக்கு வளமான சேர்க்கை.

தன்னிகரற்ற தனி லயம் (இ-புத்தகம்)

ஓர் எழுத்தாளராக, திரைத்துறை சார்ந்தவராக, புகழ்மிக்க ஆவணப்படத் தயாரிப்பாளராக, மொழிபெயர்ப்பாளராகச் சிறந்து விளங்கும் அம்ஷன் குமார், ‘அக்கரைச்சீமை’யிலிருந்து, இலங்கையின் கலை, இலக்கிய முயற்சிகளை எவ்வாறு மதிப்பிடுகிறார் என்பது நம் அக்கறைக்குரிய ஒன்றே! ‘செய்யும் தொழிலே தெய்வம்’ என்ற சித்தம் படைத்த அம்ஷன் குமார், தொழில் நேர்மையைப் பேணுவதில் ஒருபோதும் பின்நின்றவர் இல்லை. முற்கற்பிதங்கள் எதுவுமின்றி, தீட்சண்யமாகவும் கூர்மை யாகவும் எதனையும் அணுகவல்ல இவருடைய பார்வை ஈழத்துக் கலை இலக்கியம் பற்றிய நிதானமான மதிப்பீட்டை முன்வைக்கிறது. ஈழத்தின் கலை, இலக்கியம், நாடகம், திரைப்படம், ஆளுமைகள் பற்றிய குறுக்குவெட்டுமுகத் தோற்றத்தைக் காட்டும் சீரிய நூல் இது. பேராசிரியர் மு. நித்தியானந்தன் அணிந்துரையிலிருந்து. . .

பீக்கதைகள் (இ-புத்தகம்)

பதினான்கு கதைகளுடன் 2004ஆம் ஆண்டு முதற்பதிப்பாக வந்த ‘பீக்கதைகள்’ நூலில் மேலும் இருகதைகளைப் புதிதாகச் சேர்த்துப் பதினாறு கதைகளுடன் புதிய பதிப்பாக வெளியாகிறது. இதிலுள்ள கதைகள் ‘பெருமாள்முருகன் சிறுகதைகள்’ தொகுப்பில் உள்ளன எனினும் வாசகர் விரும்பித் தொடர்ந்து கேட்டுக் கொண்டிருந்ததால் இதன் வரலாற்று முக்கியத்துவத்தை உணர்ந்து மீண்டும் தனிநூலாக உருவாகியுள்ளது. உணவைப் போல நம் அன்றாட வாழ்வில் கழிப்பும் முக்கியமானது. ஆனால் உணவைப் பற்றிப் பலபடப் பேசும் நாம் கழிப்பைப் பற்றிப் பேசத் தயங்குகிறோம் அல்லது மறைமுகப் பேசுகிறோம். நுணுகிப் பார்த்தால் பேசுவதேயில்லை என்றே சொல்லி விடலாம். பேசுவதற்கான வாய்ப்பை நவீன காலம் வழங்கியுள்ளது. அதைப் பற்றிக்கொண்டு பல்வேறு சிக்கல்களை, மனநிலைகளை இக்கதைகள் மூலமாகப் பெருமாள்முருகன் சித்திரிக்கிறார். யாவரும் வாசித்துப் பயன்பெற வேண்டிய நூல் இது.

ஓரிரு சொட்டுத் தூறல் (இ-புத்தகம்)

நவீன இலக்கியம் தொடர்பாகப் பெருமாள்முருகன் எழுதிய விமர்சனக் கட்டுரைகளின் தொகுப்பு இந்நூல். பத்தொன்பதாம் நூற்றாண்டில் வெளியான ‘ஆதியூர் அவதானி சரிதம்’ முதல் சமீபகாலமாக எழுதிக் கொண்டிருக்கும் மயிலன் ஜி சின்னப்பன் கதைகள் வரையிலான விமர்சனக் கட்டுரைகள் இதில் உள்ளன. புனைவுத் தகவல்களை வரலாற்றுக்கு ஆதாரமாகக் கொள்ளுதல், சில இடைவெளிகளை நிரப்புதல், புனைவுகளின் சார்புநிலை களைப் பேசுதல், புனைவாக்க முறைகளை எடுத்துக் கூறுதல், மரபிலக்கியக் கோட்பாடுகளை நவீனத்திற்குப் பயன்படுத்துதல் என விமர்சனத்தின் கூறுகள் பலவற்றை இக்கட்டுரைகள் கொண்டிருக்கின்றன. விமர்சனக் கட்டுரை ஒன்றை ஆர்வத்துடன் வாசிக்கச் செய்யும் புனைவுமொழியும் விவரிப்புத் தன்மையும் இவற்றின்  பலமாகும்.

கமலா சுரய்யாவின் கடைசி துஆ (இ-புத்தகம்)

கவிதையெழுத்தில் ஐம்பது ஆண்டு களைக் கடந்திருக்கும் சுகுமாரனின் பத்தாவது கவிதைத் தொகுப்பு இந்த நூல். 2022-2026 வரையான ஐந்து ஆண்டுகளில் எழுதிய அறுபத்து நான்கு கவிதைகள் இதில் இடம்பெற்றுள்ளன. ஒவ்வொரு தொகுப்பிலும் தனது கவிதைகள் மாறி வருவதாக வும் அதற்கு இணையாகக் கவிதை பற்றிய கருத்துக்களும் மாற்றமடைவதாகவும் நூலின் முன்னுரையில் ஆசிரியர் குறிப்பிடுகிறார். கவிஞரே தன்னைத் தாண்டிச் செல்வதாக வும் கவிதைகள் தாமாகவே தம்மைக் கடந்து செல்வதாகவும் உரிமை பாராட்டுகிறார். அது சரிதானா என்று மதிப்பிடும் பணியை வாசகர்களிடம் கோருகிறது இந்தத் தொகுப்பு

வாழ்வை மீட்டிய கலை (இ-புத்தகம்)

‘வாழ்வை மீட்டிய கலை’ என்ற தலைப்பில் அமைந்த இந்தத் தொகுப்பு, இலக்கியம் அல்லாது இசை, சினிமா, ஓவியம், நாட்டியம் உள்ளிட்ட பிற கலைகளின் மீதான சுகுமாரனது ஆர்வத்தையும் அக்கறையையும் ஈடுபாட்டையும் வெளிப்படுத்தும் கட்டுரைகளைக் கொண்டுள்ளது. கலைகளின் மீதான தீராத ஆர்வத்தைத் தக்கவைக்கும்படியாக அமைத்துக்கொண்ட அவரது தனிப்பட்ட வாழ்வுக்கும் அனுபவத்துக்கும் மிகப் பொருத்தமானதாகவே அவை அமைந்திருக்கின்றன.

எம். கோபாலகிருஷ்ணன்

பழைய சினிமா புதிய வரலாறு (இ-புத்தகம்)

தமிழ் மக்கள்திரளைப் போல சினிமாவை வழிபடும் கூட்டம் வேறில்லை. அவர்களது அந்தரங்கத்திலும் பொதுப் புழக்கத்திலும் திரைப்படம் வலுவான தாக்கத்தை ஏற்படுத்தியிருக்கிறது; ஏற்படுத்திவருகிறது. சினிமாவைக் கலையாகவும் கலாச்சார நிகழ்வாகவும் ஆவணப்படுத்தி வைக்கும் அரிய செயலை இந்த நூல் மேற்கொண்டிருக்கிறது. திரைப்படத்தைப் பண்பாட்டு அடையாளம் என்ற வகையில் வரலாற்றுப் பார்வையுடனும் நம்பகமான தரவுகளின் துணையுடனும் ஆவணப்படுத்துகிறது. சினிமாவின் வரலாற்றை மட்டுமல்ல ஒரு காலகட்டத்தின் தமிழ்ச் சமூக வாழ்கையையும் பாதுகாத்து அளிக்கிறது இந்த நூல்.