திருவாளர் புராணம்

-கவிதைக்கும் பகடிக்கும் மிகுந்த ஏற்புண்டு. பழந்தமிழ் இலக்கிய மரபிலும் இதற்குப் பல சான்றுகளைக் காட்ட முடியும். ‘திருவாளர் புராணம்’ நம் சமூகத்தில் நீக்கமற நிறைந்திருக்கும் அதிகாரத்தைப் பகடி செய்யும் கவிதைகளையும் தீவிரமாக விமர்சிக்கும் கவிதைகளையும் கொண்ட தொகுப்பு.

நாவல், சிறுகதை எனப் புனைவுகளில் இயங்கிவரும் பெருமாள் முருகன் இடையறாது கவிதைகளும் எழுதிவருகிறார். அவர் கவிதைகளின் உரிப்பொருள் பலதரப்பட்டவை. முந்தையவற்றில் இருந்து வேறுபட்ட பொருளில் அமைந்த இக்கவிதைகள் சம்பவங் களாகவும் பாத்திரச் சித்திரிப்புகளாகவும் விரிந்து நிகழ்த்துகலை யின் தன்மை கொண்டுள்ளன. கோபத்தோடும் எள்ளலோடும் வாய்விட்டு வாசிக்கத்தக்க ஓசைநயமும் இவற்றில் இருக்கக் காணலாம்.

குரங்கிலிருந்து சிதாருக்கு

-நாம் கவனிக்கத் தவறிய எளிய கணங்களில் ஒளிந்திருக்கும் பிரம்மாண்ட அழகை, நாம் காணாது கடந்துவிடும் எளிய மனிதர்களிடம் தென்படும் பேரழகை நமக்குக் காட்டி நிற்பவை இந்தக் கவிதைகள்.

இந்தத் தொகுப்பில் இசையின் கவிதைகளில் விசேஷமாக ‘ஏதோ ஒன்று’ கூடி வந்திருக்கிறது. அது இந்தக் கவிதைகளை இருதயத்துக்கு நெருக்கமாக்குகிறது. அந்த ஒன்று கொஞ்சம் கூடிவிட்டாலும், கொஞ்சம் குறைந்துவிட்டாலும் கூவியது குயில் அல்ல என்றாகி விடக்கூடியது.

வாழ்வின் எல்லாத் தருணங்களிலும் எழுந்துவர இசையிடம் ஒரு கவிதை உண்டு.

இரா. பூபாலன்

பேய் முலை அமுது

பால் அடையாளச் சிக்கல்களை நுட்பமாகவும் தன் மரபின் பாரம்பரியத்துடன் இசைந்தும் கையாண்ட முதன்மையான கவிஞர்களுள் ந. ஜயபாஸ்கரனும் ஒருவர். அச்சிக்கல்களுடன் போராடிக்கொண்டிருக்கும் அவரது கவிதைப் பயணம் திருவாலங்காட்டுக்குப் பால் அடையாளங்களற்றுப் பால்களைக் குழப்பும் அர்த்தநாரியின் காலடியில் அமர்ந்திருக்கும் காரைக்கால் பேயிடம் வந்துசேர்ந்திருக்கிறது. உலகைத் துறந்து பால் அடையாளங்களைத் துறப்பதே அச்சிக்கல்களுக்கான தீர்வு என்பதுபோல். இக்கவிதைகளில்  விடைபெறும் தொனியும் இருக்கிறதோ என்று என்னையே கேட்டுக்கொண்டேன்; அது உண்மையெனில் பாதகம் ஒன்றுமில்லை. பெரியம்மாவின் சுவாரசியத்தைக் கவிதையில் கைப்பற்றியதே அவர் கவிதையின் உச்சம்.

ஆன்ம வணிகன்

தனது கடந்தகால சுயத்தை அறியும் பொருட்டு முன்பு மேற்கொண்ட பயணங்களின் பாதையில் மீண்டும் பயணிக்கும் கதைசொல்லி, தான் முன்பின் அறிந்திராத ஒரு தீவில் தங்க நேர்கிறது. பண்டைய மரபுகளிலிருந்து நவீனத்துக்கு மாறிக்கொண்டிருக்கும் அந்தத் தீவின் விசித்திரமும் மர்மமுமான நிகழ்வுகளை அவர் பின்தொடர்கிறார்.

இந்தோனேசியாவில் உள்ள சிம்பா என்னும் சிறிய தீவில் நடக்கும் நிகழ்வுகளே 'ஆன்ம வணிகன்' நாவலின் களம். நவீன வாழ்க்கை முறையும் நம்பிக்கையின்பாற்பட்ட பண்டைய வழக்கங்களும் பொருதும் புள்ளியே இதன் மையம். சுவாரஸ்யமான மனிதர்கள், அவர்களைக் காட்டிலும் சுவாரஸ்யமான நிகழ்வுகள் என விரியும் இந்த நாவல், முற்றிலும் புதிய வாழ்க்கை முறைகளைக் கொண்ட விசித்திர நிலப்பகுதிக்குள் பயணித்து அதை உள்ளார்ந்து அறியும் உணர்வைத் தருகிறது.

கீழைத்தேய வாழ்க்கை முறைகளின் வழக்கங்களையும் சடங்குகளையும் மேலைத்தேயப் பார்வையுடன் தனது படைப்புகளில் கையாள்பவர் இவால்ட் ஃப்ளிஸர். கீழைத்தேயப் பண்பாட்டுக் கூறுகளின் விநோதத்திற்காக அல்லாமல், அவற்றுடன் பிணைந்த அகவாழ்வையும் விழுமியங்களையும் அவை நிகழும் நிலத்துடன் பொருத்தி முன்னிலைப்படுத்துபவர். அவருடைய இந்த நாவலும் இதே வழியில் பயணம் செய்கிறது.

ஞானக்கூத்தன் கட்டுரைகள் முழுத் தொகுப்பு

-தொகுதி I : நவீன தமிழ்க் கவிதை முன்னோடிகளில் ஒருவரான ஞானக்கூத்தன், கவிதைகளைவிட அதிக அளவில் கட்டுரைகள் எழுதியிருக்கிறார். இக்கட்டுரைகள் அவர் கவிதைகளின் அழகியலும் அரசியலும் எந்த விதமான பின்னணியிலிருந்து வருகின்றன என்று காட்டுவதோடு அவரது நவீனத்தை இயக்கும் மரபு மனத்தையும் வெளிப்படுத்துகின்றன. பெருமளவு கவிதை பற்றியே எழுதியிருக்கும் ஞானக்கூத்தன், செய்யுளியல், அவர் பார்வையில் சங்க காலச் சமூகம், பாரதியாரின் வாழ்க்கை, கவிதை, புதுக்கவிதை வரலாறு, சமகாலக் கவிஞர்கள், இலக்கிய அரசியல் போன்ற விஷயங்களில் குறிப்பாகக் கவனம் செலுத்தியிருக்கிறார்.

தமிழ், சமஸ்கிருதம், ஆங்கிலம் ஆகிய மொழிகளில் உள்ள பல இலக்கண, இலக்கிய நூல்களை ஞானக்கூத்தன் விரிவாகப் படித்திருக்கிறார். குறிப்பாகத் தமிழிலும் வடமொழியிலும் தொல்காப்பியர், அபிநவகுப்தர், ஆனந்தவர்தனர் முதலிய ஆசிரியர்களின் வரையறைகளையும் கருத்தாக்கங்களையும் வெவ்வேறு காலகட்டங்களைச் சேர்ந்த கவிதைகளுக்குப் பொருத்திக் காட்டுகிறார்.

தொகுதி II

ஞானக்கூத்தன் படைப்புகளில் தரம் பார்ப்பதுபோல் அவற்றை மதிப்பீடுகளின் அடிப்படையிலும் விமர்சிக்கிறார். இந்த மதிப்பீடுகள் வடமொழி நீதி நூல்கள், சாஸ்திரங்களிலிருந்து வருகின்றன. மது அருந்துதல், புலால் உண்ணுதல், காதல், கலப்புத் திருமணம், காமம், வன்முறை, திருமணத்திற்கு முன்பு உடலுறவு, பேச்சுத் தமிழ், வட்டார வழக்கு போன்றவை படைப்புகளில் இடம்பெறும்போது அவை ஏற்பியல் லட்சணங்களுக்கு விரோதமாக இருப்பதைச் சுட்டிக்காட்டுகிறார்.

கு. அழகிரிசாமியின் நாட்குறிப்புகள் (1951-1970)

எழுத்தாளர் கு. அழகிரிசாமியின் நாட்குறிப்பு இது. நவீன --தமிழ் எழுத்தாளர் ஒருவரது நாட்குறிப்புகள் நூலாக வெளிவருவது இது முதல்முறை.

எழுத்தை மட்டுமே ஜீவனமாகக் கொண்டு வாழ்ந்த, முற்போக்குச் சாய்வுள்ள, முழுநேரத் தமிழ் எழுத்தாளரின் நாட்குறிப்புகள் இந்நூல்.

ஒவ்வொரு நாட்குறிப்பிலும் உணர்ச்சி கலந்திருக்கிறது; அனுபவம் உள்ளோடியிருக்கிறது; இலக்கியம் வெளிப்படுகிறது; சுவாரசியம் குமிழ்விடுகிறது. சந்தித்த மனிதர்கள், நேர்ந்த சம்பவங்கள் பற்றி ஆழமான பார்வைகள் கொண்டது, பல சமயம் கண்ணிவெடிகளை ஒத்த விமர்சனங்களுடன் கூடியது.

நெருப்பெனச் சுடும் வாழ்க்கையை எதிர்கொண்ட, அறத்தில் நம்பிக்கையுள்ள ஒரு கலைஞனின் தினசரிக் குறிப்புகள் இவை.

பெண்ணுடலுக்கு ஒரு சாத்திரம்

-உடற்பயிற்சி, விளையாட்டு ஆகியவற்றில் ஒரு பெண்ணுக்கு இருக்கும்

மிகப்பெரிய தடையாகப் பல சமயம் அவளது உடலே அமைந்துவிடுகிறது. மாதவிடாய்க்

காலம், கர்ப்பகாலம், மாதவிடாய் நிற்கும் காலம் எனப் பல்வேறு சமயங்களில் பெண்கள்

உடல் என்னும் தடையைத் தாண்டி வர வேண்டியிருக்கிறது. எப்படித் தாண்டுவது

என்பதற்கான கையேடுதான் இந்த நூல். 

சுறுசுறுப்பாக இருக்க விரும்பும் ஒரு பெண் எதைச் சாப்பிட வேண்டும்,

பயிற்சியின்போது என்ன உடைகளை அணிய வேண்டும், திடீர் நெருக்கடிகளையும்

காயங்களையும் எப்படிச் சமாளிப்பது என்பதையெல்லாம் மிக விரிவாகவும்

நுணுக்கமாகவும் இந்த நூல் கற்பிக்கிறது. 

இங்கிலாந்தின் தேசிய சுகாதாரச் சேவையில் பணிபுரியும் டாக்டர் பெல்லா ஸ்மித்,

விளையாட்டு ஆராய்ச்சி அறிவியலாளர் டாக்டர் எம்மா ராஸ், தடகளப் பயிற்சியாளர்

பாஸ் மொஃபட் ஆகியோர் தங்கள் நேரடி அனுபவங்களுடன் நவீன அறிவியலின்

முக்கியக் கூறுகளை இணைத்து எழுதியிருக்கும் இந்தப் புத்தகம் பெண்களின் வாழ்க்கை

நிலை ஒவ்வொன்றிற்கும் அவசியமான அறிவுரைகளை வழங்குகிறது.

மெட்ராஸ் வணிகரின் சீன மனைவி : சீன மொழிக் கதைகள்

-சூ டிஷான், சீனாவில் பரவலாக அறியப் படும் எழுத்தாளர். 1920களில் அவர் எழுதிய இந்த மூன்று கதைகள், சீனாவின் புதிய கலாச்சார இயக்கத்தில் அறிவியலும் வெளிப்படையான கருத்துக்களும் பரவியிருந்த காலத்தில் அவருடைய தனிப்பட்ட பார்வையைப் பிரதிபலிக்கின்றன. இந்தியத் தத்துவத்தால் ஆழ்ந்த பாதிப்புக்குள்ளான அவர், வாழ்வை மீட்டெடுப்பதில் மதத்திற்கு உள்ள சக்தியை முக்கியமாகக் குறிப்பிடுகிறார்.

‘மெட்ராஸ் வணிகரின் சீன மனைவி’ (ஷாங்ரென் ஃபு) கதையில், மலேசியா சென்ற சீனப் பெண், மெட்ராஸில் ஒரு முஸ்லிம் வணிகரிடம் விற்கப்பட்டு, இந்திய மொழிகளையும் மதங்களையும் கற்று ஆன்மிக விடுதலை அடைகிறாள். பிற கதைகள் மனிதர்களுக்கும் சமூகத்துக்கும் விதிக்கும் இடையிலான உறவுகளைப் பற்றியவை. தனிமனிதர்கள் விதியுடன் போராடி வாழ்வதை இக்கதைகள் ஆராய்கின்றன.

சீன - தமிழக வரலாற்றுத் தொடர்புகள் பெரும்பாலும் இராஜதந்திரம், வர்த்தகம் சார்ந்தே அமைந்திருந்தன. இந்தக் கதைகள் அந்தக் காலகட்டத்தில் சீனா, இந்தியா, தெற்காசியாவுக்கு இடையிலான தொடர்புகளைப் புரிந்துகொள்ள உதவும்.

ஈஸ்வரி (சோ சின்)  இந்தக் கதைகளைச் சீனத்திலிருந்து நேரடியாகத்  தமிழில் மொழிபெயர்த்திருக்கிறார்.

லவ் ஜிகாதும் இதர புனைவுகளும் : பொய்களை எதிர்கொள்வதற்கான எளிய உண்மைகள்

-லவ் ஜிகாத்

மக்கள்தொகை ஜிகாத்

முஸ்லிம்களைத் திருப்திப்படுத்துதல்

கட்டாய மதமாற்றம்

இவை வெறும் சொற்களல்ல; இந்தியாவின் அன்றாட உரையாடல்களை க்கிரமித்துள்ள வலுவான பரப்புரைகள்.

·         அரசியல்வாதிகளின் தூண்டுதல்

·         ஊடக விவாதங்கள்

·         சமூக வலைதளங்களில் ஓயாமல் பகிரப்படும் செய்திகள்

இவற்றால், ஒரு பெரும் மக்கள் கூட்டம் இந்தப் பொய்களையே நிஜமென நம்பத் தொடங்கியுள்ளது. இந்தக் கூற்றுகள் உண்மை யின் அடிப்படையில் அமைந்தவையா அல்லது அதிகாரத்தைத் தக்கவைக்கத் திட்டமிட்டுப் பரப்பப்படும் கற்பனைக் கதைகளா என்பதை இந்நூல் விசாரணைக்கு உட்படுத்துகிறது.

தெளிவான பார்வை, நேர்மையான வாதங்கள், நுணுக்கமான கள ஆய்வுகள் ஆகியவற்றுடன் எழுதப்பட்டுள்ள இந்த நூல், பொய்களை முறியடிக்கும் வலிமையான ஆயுதம்.

கோலம் : ஒரு புதிய பார்வை

-பெரும்பான்மைத் தமிழரின் வாழ்வுடன் இணைந்தது கோலம். ஒவ்வொரு நாளும் வீட்டு வாசலில் கோலம்போடும் வழக்கம் தமிழர் மரபில் ஊறியது. கோலம் தொடர்பான மத நம்பிக்கைகளைத் தவிர்த்துவிட்டுக் கோலத்தின் பன்முகக் கூறுகளை அறிமுகம் செய்யும் நோக்கில் இந்த நூலை லீலா வெங்கட்ராமனும் முனைவர் வெ. கிருஷ்ண மூர்த்தியும் உருவாக்கியிருக்கிறார்கள். கோலத்தை விஞ்ஞான ரீதியில் அணுகி, தகவல்களைத் தருகிறார்கள்.

கோலத்தின் வரலாறு, வகைகள், அழகு, மீனாட்சி அம்மன் கோவிலில் போட்ட லட்சம் புள்ளிக் கோலம் வடிவமைக்கப்பட்ட விதம், இணையத்தில் கோலம், இதயக் கமலம், ஐஸ்வர்யக் கோலம், கோலப் புதிர்கள், விளையாட்டுக்கள், கோலத்திற் கான மென்பொருள்கள் என்று பல தலைப்புகளில் கோலம் பற்றிய செய்திகளை இதில் காணலாம். கணிதத் துறைக்கும் கோலத்திற்கும் உள்ள தொடர்பு, பயிற்சிகள் முதலானவையும் உள்ளன.

ஆயிரம் ஆண்டுகள் பழமை வாய்ந்த கோலக் கலையை இளம் தலைமுறைக்கு அறிமுகப்படுத்தும் நோக்கில் உருவாகி யிருக்கும் நூல் இது.

செயற்கை நுண்ணறிவின் சுருக்கமான வரலாறு

-செயற்கை நுண்ணறிவு (AI) இன்று நமது வாழ்வில் நீக்கமற நிறைந்துள்ளது. ஓரிரு ஆண்டுகளுக்கு முன்பு அறிமுகமான இந்தத் தொழில்நுட்ப அற்புதம் மிக விரைவாக நம் வாழ்வை ஆக்கிரமித்துவிட்டது. ஆனால் இதன் வளர்ச்சி அத்தனை வேகமாக நடைபெற வில்லை. பல பதிற்றாண்டுகளின் உழைப்பு இதற்குப் பின்னால் இருக்கிறது. 

செயற்கை நுண்ணறிவின் நீண்ட நெடிய வரலாற்றைச் சுருக்கமாகத் தருகிறார் டோபி வால்ஷ். செயற்கை நுண்ணறிவின் உருவாக்கம் பற்றி எடுத்துக் கூறும் அவர் இந்தத் தொழில்நுட்பம் குறித்த சில கட்டுக்கதைகளையும் தகர்க்கிறார்.

இஸ்ரோவில் அறிவியலாளராகப் பணிபுரியும் பெ. சசிக்குமாரும் அவருடைய மனைவி எம். ஜோதிமணியும் இணைந்து இந்த நூலை மொழியாக்கம் செய்திருக்கிறார்கள். சசிக்குமார் செயற்கை நுண்ணறிவை அறிமுகப்படுத்தி எழுதிய  ‘மனிதனா இயந்திரமா: வெல்லப்போவது யார்?’ நூலைக் காலச்சுவடு வெளியிட்டுள்ளது.

காபூல்மீது செவ்வானம்

-1970களின் இறுதியில் ஆப்கானிஸ்தானுக்குள் ஊடுருவியது ரஷ்யா. அங்கு அது ஏற்படுத்திய அரசியல் குழப்பங்கள், ஆட்சிக் கவிழ்ப்புக்களின் விளைவாகப் போர்த் தரகர்கள் எழுச்சி பெற்றார்கள். தீவிரவாதம் செழித்தது. கொலை, கொள்ளை, பட்டினி, வேலையில்லாத்  திண்டாட்டம் பெருகின. கல்வி உள்ளிட்ட அடிப்படைத் தேவைகளும் தனிமனித உரிமைகளும் முடங்கின.

இந்தப் பிரச்சினைகளால் பந்தாடப்பட்ட ஒருவன் எவ்வாறு ரஷ்யப் படைகளிடமிருந்து தப்பித்து, வெவ்வேறு நாடுகளுக்குச் சென்று, இறுதியாக அமெரிக்காவில் குடிபுகுந்து, அங்கே தன்னுடைய வாழ்வையும் குடும்பத்தையும் மீண்டும் கட்டமைக்கிறான் என்பதைச் சாகச நாவல்களுக்கே உரிய தன்மையுடன் சொல்கிறது இந்நூல். ஒரே சமயத்தில் அனுபவப் பதிவாகவும் பயண இலக்கியமாகவும் திகழும் இப்படைப்பு ஆதிக்க சக்திகளின் நடவடிக்கைகள் பற்றியும் தீவிரவாதத்தின் பரிணாமத்தைப் பற்றியுமான நமது அறிதலை விரி வுபடுத்தக்கூடியது.