பிடிக்காத ஆசிரியர்

-பெரும்பாலான ஆசிரியர்களை மாணவர்களுக்குப் பிடிப்பதில்லை. அவர்களைப் பற்றித் தமக்குள் பேசிக் கொள்வது உண்டே தவிர பொதுவெளியில் பேசுவதும் இல்லை, எழுதுவதும் இல்லை. 'எழுத்தறிவித்தவன் இறைவன்' என்னும் பொதுமனக் கருத்தால் ஆசிரியரைப் புனிதப்படுத்தும் நம் மரபே இதற்குக் காரணம். பிடித்த ஆசிரியரைப் போற்றும் அதேசமயம் பிடிக்காத ஆசிரியரைப் பற்றியும் பொதுவெளியில் விவாதிக்க வேண்டியது அவசியம். மாணவர்களின் உளவியலைப் புரிந்துகொள்ளாமல் அதிகாரம், சாதி, பழிவாங்கும் உணர்வு, பணத்தாசை எனப் பல ஆசிரியர்கள் படுமோசமாக இருக்கின்றனர். இவற்றை அனுபவம் சார்ந்து வெளிப்படுத்தும் கட்டுரைத் தொகுப்பு இந்நூல் முப்பத்தாறு பேர் தம் மனக்குமுறல்களைக் கொட்டி எழுதியுள்ள இக்கட்டுரைகள் புழுங்கிக் கொண்டிருக்கும் பலரது உணர்வுகளைப் பிரதிநிதித்துவப்படுத்தும் வகைமாதிரிகள்.

மம்மர் அறுக்கும் மருந்து

-கல்விப் பிரச்சினைகள் பலவாக இருப்பினும் அவற்றைப் பற்றி பொதுவெளியில் பேசுவோர் குறைவு. ஒப்பீட்டளவில் பள்ளிக்கல்வியைப் பற்றிய எழுத்துக்களும் பேச்சுக்களும் கணிசமாக இருந்த போதிலும் உயர்கல்வி குறித்தவை அவ்வளவு இல்லை. அக்குறையைப் போக்கும் வகையில் தொடர்ந்து உயர்கல்விச் சிக்கல்களைப் பேசியும் எழுதியும் வருபவர் பெருமாள்முருகன். தமிழ் இலக்கிய மாணவராகப் பல நிறுவனங்களில் பயின்று அரசு கலைக்கல்லூரியில் தமிழ்ப் பேராசிரியராகவும் முதல்வராகவும் பணியாற்றி ஓய்வு பெற்ற அவர் தம் அனுபவத்தைக் கலந்து உயர்கல்வி குறித்து வெளிப்படப் பேசியுள்ள நீண்ட நேர்காணல் தொகுப்பு இந்நூல். ஜப்பான் தோக்கியோ அறிவியல் நிறுவனத்தில் வேதியியல் ஆராய்ச்சியாளராக இருக்கும் சா. விஜயகுமார் இதற்கான கேள்விகளை உருவாக்கி உள்ளார்.

தத்வமசி

-தத்வமசி

17ஆம் நூற்றாண்டின் சோழமண்டலக் கரையிலும் யாழ்ப்பாணக் குடாநாட்டிலும்

டச்சுக்காரர்களின் காலனிய நிழல் படர்கிறது. குருதியும் அடிமை வணிகமும் பேரழிவும்

மலிந்த பெருநிலத்தில், வாழ்வின் நிலையாமையை முகத்திலடித்தாற்போல் உணர்ந்து

மனை துறக்கிறான் ஒருவன். அகத்தின் வெளிச்சத்தைத் தேடி அலையும் அவனுக்குக்

காலம் சூட்டும் பெயர் ‘தத்வமசி’.

கிரிசாந்தின் பிரம்மாண்டமான புனைவெழுத்து, வரலாற்றின் அந்தகார உண்மைகளையும்

தத்துவத்தின் ஆழங்களையும் ஒன்றிணைக்கிறது. மானுட இருப்பைப் பற்றியும், அதன்

நித்தியமான ஆன்மீகத் தேடலைப் பற்றியும் துணிச்சலாகக் கேள்வி எழுப்பும் ஒரு

காலத்தின் பெருஞ்சித்திரம்.

அதிகாரத்தின் வாள்முனையில் அடியோடு வீழும் வாழ்விலிருந்து, ஆத்மா தன்

விமோசனத்தைக் கண்டடையும் தத்துவப் பயணம் இந்நாவல்.

ஈரம்

-ஈரம்

பயம், பக்தி, முட்டாள்தனம், ஏக்கம் முதலியன இக்கதைகளின் முக்கியமான

கருப்பொருட்கள். உளவியல் அதிர்வுகள் மனதிற்குத் தாக்கம் விளைவிக்கும்.

கூர்ப்பார்வையில் காட்சிகள் விரிகின்றன. நகைச்சுவையும் கசப்பும் கலந்த கதைகள்

வாசித்துச் சிலநாட்களுக்கு ஈரம் நீடிக்கும். மலேசியப் பண்பாட்டின் சிதறல்கள்

ஸ்ரீகாந்தனின் கதைகளுக்குள் ஒளிந்திருக்கின்றன.

- சரவணன் மாணிக்கவாசகம்

கதம்பம்

-கதம்பம்

இலக்கியம், வரலாறு, சிந்தனைத் துறைகளில் தமிழ் அறிவுலகம் எந்தப் பாதையில் பயணித்துக்கொண்டிருக்கிறது என்பதை எளிமையாகவும் தெளிவாகவும் அறிமுகப்படுத்துகிறது இந்நூல். தமிழ் மொழியில் ‘மெய்’ என்ற சொல் உடலையும் உண்மையையும் ஒரே நேரத்தில் குறிக்கும் தத்துவ அழகை விளக்குவது, பழைய புராணக் கதைகளை இன்றைய நவீன எழுத்தாளர்கள் எப்படிப் புதிய கோணங்களில் மறுவாசிப்பு செய்கிறார்கள் என்று ஆராய்வது, சிறுகதைகளில் வரலாற்றுத் தகவல்கள் எல்லை மீறும்போது கதைத்தன்மை எப்படிப் பாதிக்கப்படுகிறது என்பதைச் சுட்டிக்காட்டுவது எனப் பல சுவாரசியமான விவாதங்கள் அடங்கியுள்ளன. 

எளிய மக்களின் குரல்கள் சமூகத்தில் எப்படி ஒடுக்கப்படுகின்றன, சோழமண்டலக் கடற்கரையில் நெசவாளர்கள் எவ்வாறு பெரிய வணிகர்களாக வளர்ந்தார்கள், தமிழ்ச் சமூகத்தில் சாதி அமைப்புகளும் துறவற மரபுகளும் எவ்வாறு உருவெடுத்தன எனப் பல வரலாற்று உண்மைகளையும் இந்நூல் பேசுகிறது. இக்கட்டுரைகள், தமிழ்ப் பண்பாட்டையும் இலக்கியத்தையும் புதிய கண்ணோட்டத்தில் அணுகுவதற்குச் சிறந்த வழிகாட்டியாக அமையும்.

ராதாபாயின் சத்திரம்

-ராதாபாயின் சத்திரம்

தூயனின் கதைகள் மனித வாழ்வின் புதிரான கணங்களைப் பேசுகின்றன. அவை விலக முடியாத விதியின் நிழல்களைப் புனைவு மொழியில் சித்திரிக்கின்றன. இத்தொகுப்பில் உள்ள கதைகள் ஒவ்வொன்றும் தனித்துவமான நிலப்பரப்பை காண்பிக்கின்றன. 

அந்த நிலப்பரப்பைச் சேர்ந்த மனிதர்களின் தொன்மங்களும் நம்பிக்கைகளும் மனத்தின் விசித்திரங்களோடு உரையாடுகின்றன. விதியின் புதிர்ப்பாதைகளைக் காட்டுகின்றன. இக்கதைகள் யதார்த்தத்தின் அடித்தளத்திலிருந்து தொடங்கி, அங்கிருந்து மாயமும் படிமங்களும் அடர்ந்த புனைவுலகை நோக்கி நகர்கின்றன.

அட்சரேகை

-அட்சரேகை

கானலை நதி என்று நினைத்து நீந்தியவர்கள், அவர்களை ஆதரிசமெனக் கொண்டு நீந்த இறங்கியவர்களின் கதைகளும் கிளைக்கதைகளுமாக விரிகிறது கார்த்திக் பாலசுப்ரமணியனின் அட்சரேகை. இதில் இளமைக்கே உரிய வழக்கமான இலட்சியங்கள் பொருளிழக்கின்றன; அவற்றை நோக்கி நடையாய் நடந்த பாதை களிலும் ஒளி அவிந்துவிடுகிறது. பின் மிஞ்சுவது நினைவுகள் மட்டுமே. நினைவுகளில் செதுக்கிவைத்திருப்பவர்கள் புனைவின் கடைசிப் பக்கம் வரையிலும் உயிர்ப்புடன் வருகிறார்கள். ஏதேதோ திசைகளிலிருந்து, எதிர்பாராத திருப்பங்களிலிருந்து, சிலர் மறைந்த பின்னும், ஏன் செத்த பின்னும்தான்.

நினைவுகளோடு கலந்துவரும் பல்வேறு இடவெளிகளின் குவிமையமாகிறது ஒரு சிறிய அறை. அரசு வேலைகளுக்கான தேர்வுகளுக்குப் படிப்பவர்களுக்கு அவர்களது போராட்டங்களின், வீழ்ச்சிகளின், காயங்களின் சாட்சியாக இருக்கும் அறை. கதையை நகர்த்திச் செல்லும் சமூக, பொருளாதார வரலாறுகளை அந்த அறை பார்க்கிறது. அதன் கண்களோடு வாசகர் தன் கண்களைச் சேர்த்து இமைக்கக் கேட்கிறது.

கார்த்திக்குக்கு அநாயாசமாய் வசப்பட்டிருக்கும் யதார்த்த அழகியலோடு கூடவே சிதறுண்ட உணர்வுகளின் வண்ணங்களும் துல்லியமான விவரணைகளும் கதாபாத்திரங்கள் அடையும் பரிணாமங்களும் நாவலின் வலுப்புள்ளிகள். வாசகரை அவை பிரதிக்குள் இழுத்துப்போடுகின்றன.

அபாயம்

-அபாயம்

அணுவுலைக் கூடத்தில் பணியாற்றும் பென்ட்டிங், துபோன், மோலினார் மூவரும் கதிர்வீச்சால் பாதிக்கப்படுகிறார்கள். மரணம் நிச்சயிக்கப்பட்டுவிட்ட இவர்கள் மருத்துவமனையில் உணர்கின்ற உடல் வேதனைகளை, மன நெருக்கடிகளை இந்தக் குறுநாவல் தீவிரத்துடன் விவரிக்கிறது. அன்றாட உலகத்தின் சாதாரண வாழ்க்கைக்காக மூவரும் ஏங்குகிறார்கள். வெவ்வேறான இயல்பும் எதிர்பார்ப்புகளும் கொண்ட இவர்களின் விதியோ ஒன்றாக இருக்கிறது. ஒருவனை மரணம் முன்னமே அழைத்துக்கொள்கிறது.

மற்ற இருவரும் அது தங்களை நெருங்கும் முன் மருத்துவமனையிலிருந்து வெளியேறிப் புறவுலகில் எங்கேனும் கண்காணா இடத்தில் அமைதியான வாழ்க்கை வாழ்வதற்கு விரும்புகிறார்கள். தப்பிச் சென்றும்விடுகிறார்கள். ஆனால் அவர்களுக்குக் காத்திருப்பது என்ன? மனிதன் இன்று எதிர்கொள்ளும் அபாயம் அணுக்கதிர்வீச்சாகத்தான் இருக்க வேண்டும்‌ என்றில்லை; -அந்த அபாயத்தைச் செட்டான மொழியில் இறுக்கமாகச் சொல்லும் இக்குறுநாவல் நவீன வாழ்வின் அவலத்தை உணர்த்துகிறது.

பதிப்புப் பரிமாணங்கள்

-பதிப்புப் பரிமாணங்கள்

ஏட்டுச் சுவடிகள், இலக்கணங்கள், இலக்கியங்கள், காகிதச் சுவடிகள் எனப் பிரதிகளைப் பதிப்பித்தல் மரபிலிருந்து நவீனமடைந்து பதிப்பியல் நெறிமுறைகள், மூலபாட ஆய்வு, பாட வேறுபாடு, செம்பதிப்பாக்கம், பதிப்பியல் திறனாய்வு, சந்தைப்படுத்தல், காப்புரிமை என்று இன்றைய பதிப்பியல் விஞ்ஞானம் விரிவடைந்துள்ளது. இவ்விரிவாக்கம் சார்ந்த சிந்தனைகளும் ஆய்வும் பற்றிய அறிவியல்பூர்வமான கட்டுரைகள் பதிப்பாளுமைகளால் எழுதப்பட்டு வந்துள்ளன. 

ஏறத்தாழ இருபதாண்டுக் காலப்பகுதியில் பதிப்பியலின் இப்பரிமாணங்கள் பற்றிக் ‘காலச்சுவடு’ இதழில் வெளிவந்த நாற்பதுக்கும் மேற்பட்ட கட்டுரைகளின் தொகுப்பு இந்நூல். பதிப்பியல் வளர்ச்சி வரலாறு குறித்துப் பரவலாக அறியும் வாய்ப்பு இன்றைய பதிப்பாளர்க்கும் பொதுவாசகனுக்கும் கிட்ட வேண்டும் என்பது இத்தொகுப்பின் முதன்மை நோக்கம். பதிப்பியல் முறையியலின் வளர்ச்சிக்கான வெளியில் மாற்றங்களுக்கான வாய்ப்புக்கு இத்தொகுப்பில் இடம்பெறும் கட்டுரைகள் துணை நிற்கும். குறிப்பாக, பதிப்பித்தல் சார்ந்த நெறிமுறைகளின் அடிப்படையில் செம்பதிப்பாக்கப் பதிப்பியல் முறையியலைத் தரப்படுத்திப் பதிப்பாசிரியர்க்கு வழங்க இத்தொகுப்பு மூலவள நூலாக உதவும்.

தோறை

-தோறை

மொழியாலும் கதை சொல்லும் வடிவத்தாலும் புதிய பாய்ச்சலை அடைந்திருக்கிறது யதார்த்தனின் ‘தோறை’. 

பெண்ணுக்கு முதல் தெய்வம் காமம். காமம் அவளுக்குக் காற்றில் இருக்கிற வெக்கை. தெய்வமாகிற பெண்களே நாச்சிமாரும் நகுலாத்தையும் தென்குமரிப் பெண்ணும் நீலிகளும் யட்சிகளும். காடு, மலை, கடல், களனி என்று எல்லா இடமும் தனித்து நிற்கிறார்கள். கன்னித் தெய்வங்களும் தேவித் தெய்வங்களும் தாய்த் தெய்வங்களும் ஒரே தெய்வத்தின் பல்வேறு வடிவங்களே என்கிறது இந்நாவல்.

பெண் தனது தாய்மையை ஏற்பதையும் மறுப்பதையும் போற்றுவதையும் ‘தோறை’ நாவல் விவாதிக்கிறது. தொன்மக் கதைகளின் வழியாகவும் கூத்துவடிவக் குரலிலும் நாடக வடிவத்திலும் வாசகருடன் உரையாடுகிறது. 

யதார்த்தனின் இரண்டாவது நாவல் இது.

நாட்டார் தெய்வங்களும் படையல்களும்

-நாட்டார் தெய்வங்களும் படையல்களும்

தமிழ்ச் சமூகத்தின் நாட்டார் தெய்வங்களும் படையல்களும் மிக நீண்ட வரலாற்றால் கட்டமைக்கப்பட்டவை. சமூகப் பண்பாட்டு வரலாறு இவற்றில் பூடகமாகப் பொதிந்துள்ளது. தாந்திரிகம், ஆசீவகம், சமணம், பௌத்தம், வைதீகம், நாட்டார் சைவம், நாட்டார் வைணவம் எனப் பலவகையான மதங்களும் இவற்றில் செல்வாக்கு செலுத்துகின்றன. இந்த நூலின் விசாலமான பெரும் பரப்பில் இவை அனைத்தையும் வாசித்து அனுபவிக்கலாம்.

54 செறிவான கட்டுரைகள் இந்நூலில் உள்ளன. கட்டுரையாளர்கள் தம் வாழ்வு அனுபவத்திலிருந்து கட்டுரைகளைப் படைத்திருக்கிறார்கள். கள ஆய்வு, அகவயப் பார்வை, செறிவான நோக்கு, அடர்த்தியான வரைவியல் எனப் பலவகையான செய்நேர்த்திகளை நூலில் காணலாம். கத்தோலிக்கத்திலும் தர்காகளிலும் நாட்டார் வழிபாடு சார்ந்த நேர்ச்சைகளையும் படைக்கப்படும் உணவையும் இந்நூல் பேசுகிறது. 

நாட்டார் தேவகணத்தின் குறுக்குவெட்டுத் தோற்றத்தை இந்நூல் புதிய வெளிச்சத்தில் காட்சிப்படுத்துகிறது. படையல்களின் பண்பாட்டு அர்த்தங்களைக் கண்முன் விரியச் செய்கிறது; இதன் வகைமை யில் இது ஒரு முதல் நூலாகும். நமது நாட்டார் மரபின் பண்பாட்டு ஆவணம் நம் வசமாகியிருக்கிறது. அனைவரும் வாசித்துப் பாதுகாக்க வேண்டிய நூலிது.

அ. முத்துலிங்கத்தின் 'திருடமுடியாத கதைகள்'

-அ. முத்துலிங்கத்தின் திருடமுடியாத கதைகள்

இந்தத் தொகுப்பில் உள்ள கதைகள் ‘எழுத்தாளர் அ. முத்துலிங்கத்தின் கதைகளில் உலக

மாந்தர்கள்’ என்கிற தலைப்பில் எண்ணத்தக்கவை. ஒரு நேர்காணலில் அவர் ‘எனது

அனுபவங்களை யாரும் திருட முடியாது’ என்று குறிப்பிட்டார். அதே போல் அவரது

பிரத்தியேகமான அனுபவங்களைக் கொண்டு எழுதப்பட்ட இந்தக் கதைகளையும் யாரும்

திருட முடியாது. ஏனென்றால் இது அவருக்கே உரித்தான அனுபவங்கள். எனவேதான்

இத்தொகுப்பிற்கு இந்தப் பெயர் வைக்கப்பட்டுள்ளது.

இச்சிறுகதைகள் தோற்ற எளிமை கொண்டிருந்தாலும் உள்விரிவு கொண்டவை.

கதைகளில் உலவும் வெவ்வேறுபட்ட கதாபாத்திரங் களின் குணச்சித்திரங்கள் படிக்கப்

படிக்கச் சுவாரஸ்யம் தருபவை. அதேவேளை அங்கே நிலவும் கலாச்சாரம், பண்பாடு

போன்றவற்றை யும் கதைகளின் ஊடாக கதாசிரியர் நமக்குள் கடத்திவிடுகிறார். பல்வேறு

உணர்வுகளைக் கிளறும் அந்தப் பாத்திரங்களின் அக ஓட்டங்களை ஒப்பிட்டுப் பார்த்தால்

மனிதவர்க்கத்தின் ஆதிப் பண்பு எதுவென விளங்கிக்கொள்ள முடியும்.

இந்தக் கதைகளின் மூலம் பல்வேறு நிலப்பிரதேசங்களில் வாழும் மனிதர்களைக்

கடவுச்சீட்டும், நுழைவிசைவும் இல்லாமலேயே தரிசிக்கும் வாய்ப்பு கிடைத்துவிடுகிறது.

தன்னைத்தான் காக்கின்

-உலகமயமாக்கலின் உதிர்காலம் இது. எண்ணற்ற நம்பிக்கை களையும் வாய்ப்புக்களையும் உருவாக்கிய உலகமயம் இப்போது முடிவுக்கு வந்துவிட்டதாக அரசியல் வல்லுநர்கள் கூறுகிறார்கள்.

சோரகவி மரபு

-பழந்தமிழ் இலக்கியப் பதிப்புகள், நவீன இலக்கியப் பதிப்புகள் பற்றிய நுட்பமான கட்டுரைகளை ஒருபகுதியாகவும் இலக்கியத் திருட்டு தொடர்பானவற்றை இன்னொரு பகுதியாகவும் கொண்ட நூல் இது. துறைசார் வல்லுநர்கள் மட்டுமல்லாது இலக்கிய வாசகர்களும் அறிந்துகொள்ள வேண்டிய பல தகவல்களும் பார்வைகளும் இதில் உள்ளன. அறிவுப்புலம் சார்ந்த கட்டுரைகளைச் சுவையான மொழியில் எழுத முடியும் என்பதற்குச் சான்று இந்நூல்.

‘முன்முடிவின்றி எதையும் அணுகுதல், எதிராளிக்கு வசதியான இடம் தருதல், சொல்ல வரும் செய்தியை ஆராய்ந்து பிறகு பேசுதல் போன்ற அருங்குணங்கள் கொண்டவர் பெருமாள்முருகன். அதனாலேயே எண்ணெய் ஊற்றப்பட்ட கண்ணாடித் தரையில் நடக்கும்படியான கவனம் தேவைப்படும் இந்தக் கட்டுரைகளைப் பெருமாள்முருகனால் எழுத முடிந்திருக்கிறது’ என்று பழ. அதியமான் இந்நூல் அணிந்துரையில் குறிப்பிடுகிறார்.

செம்மீன்

-செம்மீன், ஒரு மீனவர் சமூகத்துக் கதை. செம்மண்

குஞ்சுவின் வாழ்க்கையையும் வீழ்ச்சியையும் சொல்லும் கதை: கடற்கரைக் கன்னி கறுத்தம்மாவின் தூய காதல் கதை; தனது செயல் ஒரு தியாகம் என்பதையே உணராத தியாகி பரீக்குட்டியின் கதை; ஊக்கமும் உற்சாகமும் உருவான சக்கியின் உழைப்புக் கதை; ஆண்மையும் ரோஷமும் மிக்க இளைஞன் பழனியின் கதை; மேலைக்கடல் அன்னையின் செல்லக் குழந்தைகளது நித்தியகக் கதை.

எளிய கதாபாத்திரங்களையும் சாதாரண சம்பவங்களையும் கொண்டு வரைந்த அழியா வண்ணச் சொற்சித்திரம் 'செம்மீன். தகழி சிவசங்கரப் பிள்ளை எழுதிய இந்தப் புகழ்பெற்ற நாவல் 1959இல் சாகித்திய அகாதெமி விருது பெற்றது. பல இந்திய மொழிகளில் சாகித்திய அகாதெமியின் ஆதரவில் இந்நூல் வெளிவந்துள்ளது. இந்நூலைத் தமிழாக்கம் செய்தவர் சுந்தர ராமசாமி.

ஒரு மனிதன் ஒரு வீடு ஒரு உலகம் (விலையடக்கப் பதிப்பு)

-சமத்துவமும் இணக்கமான சக வாழ்வும் அன்பும் நிறைந்த உலகை அனைவருமே விரும்புகிறோம். அத்தகைய கனவின் கலாபூர்வமான வெளிப்பாடு என்று ‘ஒரு மனிதன் ஒரு வீடு ஒரு உலகம்' நாவலைச் சொல்லலாம்.

வட்டாரம், சாதி, மதம், மொழி, இனம் என எந்த அடையாளமும் அற்ற உலகக் குடிமகன் என்று சொல்லத்தக்க ஹென்றி என்னும் கதாபாத்திரத்தின் வழியே ஜெயகாந்தன் இந்தக் கனவை முன்வைக்கிறார். ஆசாபாசங்களும் அன்றாட நெருக்கடிகளும் கொண்ட மனிதர்களும் இந்த நாவலில் கணிசமாக இருக்கிறார்கள் என்றாலும் இவற்றையெல்லாம் கடந்து வாழ்வின் வேறொரு தளத்திற்குச் செல்வது எப்படி என்பதை இந்த நாவல் கோடிகாட்டுகிறது. லட்சியக் கனவை முன்வைக்கும் நாவல் யதார்த்தத்தில் அழுத்தமாகக் காலூன்றி நின்றபடி அதைச் செய்கிறது.

52 ஆண்டுகளுக்குப் பிறகும் புத்துணர்வைத் தக்கவைத்துக்கொண்டிருக்கும் இந்த நாவல் நவீன தமிழின் சிறந்த படைப்புகளில் ஒன்று.

கல் விளக்குகள்

-ஜோடனைகளைக் கழற்றி எறிந்தாடும் உக்கிரனின் கையில் நெருப்பாக, படிப்பவர்கள் மீது வாதைகளை ஏவும் மந்திர மொழியாக வெளிப்படும் ராஜ்குமாரின் கவிதைகள், பச்சை மிளகாய் அரிந்துபோட்ட கருவாட்டுக் குழம்பாகவும் ருசிக்கின்றன. இந்தக் கவிதைகளினூடே நாம் தெய்வங்களையும் பேய்களையும் சந்தித்து நட்பாக்கிக் கொள்கிறோம். இரவல் பெறாத சொற்களால் நெய்யப்பட்ட இக்கவிதைகள் இதுவரை புறக்கணிக்கப்பட்ட, அவமதிக்கப்பட்ட மக்களின் உலகை ஒரு அகழ்வாராய்ச்சியாளனின் பொறுப்போடும் நேர்மையோடும் முன்வைக்கின்றன. ராஜ்குமாரின் வெளிவந்த மற்றும் வெளிவராத படைப்புகளிலிருந்து தேர்ந்தெடுக்கப்பட்ட கவிதைகளைக் கொண்ட இந்தத் தொகுப்பு தலித் கவிதைகளுக்கு மட்டுமின்றி தலித் பண்பாட்டுக்கும் முன்னுதாரணமாகத் திகழ்கிறது.

சில நேரங்களில் சில மனிதர்கள்(விலையடக்கப் பதிப்பு)

-பெரும் அதிர்வுகளை ஏற்படுத்திய அக்கினிப் பிரவேசம்' சிறுகதையின் நீட்சியாக உருவான சில நேரங்களில் சில மனிதர்கள் நாவல். ஒரே சம்பவத்தின் மாறுபட்ட சாத்தியக் கூறுகளைப் பற்றிய சிந்தனைக்கான வாசல்களைத் திறந்துவைக்கிறது.

ஒரு சம்பவத்தின் விளைவு எப்படி வேண்டுமானாலும் இருக்கலாம். நிஜ வாழ்வில் அதன் சாத்தியங்கள் எண்ணற்றவை; புனைவிலும் அப்படித்தான். பதின் பருவத்தில் வன்புணர்வுக்கு ஆளான ஒரு பெண் சமூகத்தின் பார்வையில் களங்கப்பட்டு நிற்கிறாள். ஆனால் அந்தக் களங்கத்தைக் கண்டு ஒடுங்கிவிடாமல் கம்பீரமாக எழுந்து நிற்கிறாள். தன் வாழ்க்கையைத் தானே தீர்மானிக்கும் துணிவுடன் செயலாற்றுகிறாள்.

தமிழ்ப் புனைவுலகின் மறக்க முடியாத பாத்திரங்களில் ஒன்றாக இந்த நாவலின் நாயகி உருப்பெறுகிறாள். அந்தப் பாத்திரத்தின் முன்னிலையில் மற்றவர்கள் சிறுத்துப்போகாமல் தத்தமது அடையாளங்களுடன் காத்திரமாக வெளிப்படுகிறார்கள். இதன் மூலம் அவளோடு சம்பந்தப்பட்ட அனைவருக்குமான நியாயத்தை ஜெயகாந்தன் வழங்குகிறார்.

தனியொரு பெண்ணின் கதையைச் சொல்லவந்த ஜெயகாந்தன் அதன்வழி சமூகத்தின் மதிப்பீடுகளையும் தீவிரமாகக் கேள்விக்குட்படுத்துகிறார். கருத்தின் மூலம் அல்லாமல் வாழ்வின் அசைவுகளைக் கலாப்பூர்வமாகச் சித்தரிப்பதன் மூலம் இதைச் செய்கிறார். எழுதி 55 ஆண்டுகள் கழித்தும் வாசகர்களின் மகத்தான வரவேற்பைப் பெற்றுவரும் இந்த நாவல் நவீன இலக்கியத்தின் செவ்வியல் படைப்புகளுள் ஒன்றாக மிளிர்கிறது.

கடல்புரத்தில்

-துளியை நுணுக்கமாகச் சித்திரிப்பதன் வழியாக, வெளியை அதன் விரிவோடு எழுப்பிக்காட்ட முயல்வது எழுத்தின் ஆதாரமான நோக்கங்களில் ஒன்று. இச் சிறுநாவலில் அந்த ரசவாதம் குறைந்த பக்கங்களுக்குள்ளாகவே நிகழ்ந்தேறியிருப்பதைக் காணலாம். ஒரு எளிய மீனவக் குடும்பத்தைப் பற்றியதாகத் தொடங்கும் கதையானது, அது அமைந்திருக்கும் அகண்ட கரையை, அதற்கப்பால் விழிக்கெட்டாத தூரத்திற்கு விரிந்துகிடக்கும் கடலைப் பற்றின கதையாகவும் பெருகிவிடுகிற மாயம் எவ்விதப் பிரயாசையுமின்றி இயல்பாகவே நிகழ்கிறது. இது கடல்புரத்தைக் குறித்த கதை மாத்திரமல்ல; கடலைப் பின்புலமாக்க் கொண்டு இயற்கைக்கும் மனிதனுக்கும், பழமைக்கும் புதுமைக்கும், தந்தைக்கும் மகனுக்கும், ஆணுக்கும் பெண்ணுக்கும், அன்பிற்கும் பகைக்கும், உடலுக்கும் உள்ளத்திற்கும் இடையிலான சிக்கலான பிணைப்புகளை, அவற்றில் விழுந்துவிடுகிற முடிச்சுக்களை, அவற்றை அவிழ்க்க முயன்று தோற்ற அலைகழிகிற மனத்தின் பாடுகளை எனப் பலதையும் குறித்து ஆதூரத்துடன் பேசுகிறது. முதல்பதிப்பு வெளியாகி முப்பதுக்கும் அதிகமான வருடங்கள் கடந்துவிட்டபோதிலும், இன்றும் வாசகர் கவனத்தைத் தக்கவைத்துக் கொண்டிருப்பது இந்நாவலின் முக்கியத்துவத்தை உணர்த்துகிறது. க.மோகனரங்கன்

காந்தி 1915: திரும்பி வந்த மைந்தன்

-1915, சத்தியாக்கிரகத்தின் மூலம் தென்னாப்பிரிக்க இந்தியர்களுடைய உரிமைகளை மீட்டுத்தந்த தலைவராகத் தாயகம் திரும்புகிறார் காந்தி. இனி இந்திய விடுதலைக்குப் பங்களிக்க வேண்டும் என்பதுதான் அவருடைய விருப்பம். ஆனால், அதற்கு முன்னால் இந்தியாவை நன்றாகப் புரிந்துகொள்ள வேண்டும் என்கிறார் அவருடைய அரசியல் ஆசானான கோபால கிருஷ்ண கோகலே.

காந்தி ஓராண்டுக்கு இந்தியாவைச் சுற்றிப்பார்க்கிறார். மக்களை நெருக்கமாக அணுகிப் புரிந்துகொள்கிறார். அதன்பிறகு இந்திய விடுதலைப் போராட்டத்தில் தீவிரமாக இறங்குகிறார்.

இந்திய விடுதலைப் போராட்டத்தின் முதன்மைத் தலைவராக, தேசத் தந்தையாகக் காந்தி பரிணாம வளர்ச்சி பெற்றதற்கான அடித்தளம், இந்தப் பயணத்தின்போது அவர் பெற்றுக்கொண்ட அனுபவங்களும் பாடங்களும்தான். காந்திக்கு இந்தியாவைப் புரியவைத்த அந்த ஓராண்டுப் பயணத்தைப் பற்றிய விரிவான பதிவு இந்நூல்.